بالبلدي… ناصر خليفة يكتب: «يبقى فيها حاجة غلط»
كلنا نعرف ان محدش بياخد رزق حد وان كل واحد بيجيله رزقه اللي مكتوب له !
لكن السؤال؟
ما هو مفهوم الرزق ؟
الرزق مش بس فلوس وعمر الفلوس لوحدها كانت نعمة !
لانها ممكن تكون نقمة على صاحبها ! اقل نعمة من نعم ربنا -غير الفلوس- لا تعادلها كنوز الدنيا كلها ! زي نعمة الستر ونعمة الرضا ونعمة حُسن الخُلق نعمة الصحة والعافية،،،
فوقوا يا بشر !
ثروة المهرجانات والهلس والمسخرة مش رزق مش نعمة دي نقمة تعود على صاحبها بالخراب المستعجل خصوصا لما يغتر بيها ويستكبر على خلق ربنا ويقول انا نمبر ون .. قارون قال انما اوتيته على علم عندي ربنا خسف بيه وبماله في سابع أرض لمجرد إنه استكبر واغتر مع العلم ان كنوزه مكنتش من الرقص والعري والهلس والهشك بشك ولا من المهرجانات ولا من مشاهدات اليوتيوب واليوحبوب ..!
يبقى فيها حاجات غلط .
ظاهرة المهرجانات حولت مجتمعنا الى أكبر مهرجان، ومهرجان من التهريج والمسخرة ! الناس اللي بتدافع عنهم مش قادرين يستوعبوا حجم المصيبة والابتلاء ! لما شاب يتحول لملياردير في لحظة في الوقت اللي الاف من اساتذة الجامعات يدخل جمعية علشان يقدر يجهز بنته وبالتقسيط الممل !.
يبقى فيها حاجه غلط !
لما مجدي شطة وشاكوش وحموبيكا ورمضان الخ الخ يبقى عندهم فلل واستراحات وقصور الخ الخ واحدث موديلات سيارات ! في الوقت اللي عندنا علماء مدفونين في المعامل والابحاث العلمية وساكنين ايجار قديم ! وشباب من خريجي الجامعات ومن اهم التخصصات شغالين على توكتوك اشتروه بالقسط !!.
يبقى فيها حاجة غلط !
لما أذواقنا وأخلاقنا تتلخبط وتتشوه.
يبقى فيها حاجة غلط ! .
لما قطاع كبير من الشباب يتحول لبلطجية ومتحرشين وحشاشين وحرامية!!.
يبقى فيها حاجة غلط !.
لما اغنية تافهة وساقطة لحن وكلمة وصوت تكسر الدنيا وتنتشر كالنار في الهشيم وتحقق لاصحابها الملايين في الوقت اللي في ناس مش لاقيه عيش حاف ولا بطانية تدفيهم في عز البرد !.
يبقى فيها حاجة غلط !
لما رمضان يتسبب في خراب بيت "الطيار" ويشوه تاريخه ويحطم نفسية اولاده !!.
يبقى فيها حاجة غلط !.
لما الأجيال الجديدة تتحول لببغاوات تردد أتفه أغاني ! ويبقى كل هدفهم انهم يبقوا زي رمضان والا شطة ولا كزبرة !.
يبقى فيها حاجة غلط ! .
لما حضرتك متقتنعش بالكلام ده وتشاركني الشعور بالخطر !
يبقى فينا الف حاجة وحاجة غلط !.
مش لازم نفضل زي اللي قال عليهم ربنا "صم بكم عمي فهم لا يرجعون".
بلاش نفضل زي الذين إذا قيل لهم لا تفسدوا في الارض قالوا انما نحن مصلحون ..!
بينما هم المفسدون ولكن لا يشعرون ..!
