محمد خليفة يكتب: رِجّالة نص كم!

بلاغ إلي كل الأزواج الرجالة بس .. الرِجّالة النص كم لأ! رأيت بعينى هذا الأمثلة ممن يٌطلق عليهم خطئاً رِجالاً، فخلال فترة الخطوبة وقبل الزواج نجدهم يفرشون الأرض وروداً ووعودا للزوجة المرتقبة ، يا حبيبتى ها اخليكي تعيشى أحلي أيام عٌمرك معايا ، وها نقضى شهر العسل فى اليونان، وكمان ها اشتريلك عربية 28،وهاتك يا غزل وحٌب من اللي يعجبكم ،والفيس يا ولداه تعب من الشات وكلام الماسينجر اللي ما بيخلّص،والمسكينة عبيطة صدقته ،عايزة تستر نفسها بجوازة وخلاص، اهو تخلص من العزوبية ، واهو ضل رجل ولا ضل حيطة،،، يا بت دا كداب متصدقهوش ، لأ يا ماما دا فلان راجل وبيحبني ! متعرفش انها ها تقع علي جدور رقبتها ومحدش ها يسمى عليها، وبعد الجواز والدلع في الكام يوم الأوليين بدأت تعيش مقلب عمرها ، فالأمور تتكشف لها يوم بعد يوم، نص الرجل ده يبدأ يقولها بتقبضى كام، هاتي فلوسك معايا وانا اللي ها امسك المصروف، ترد العبيطة تقوله ماشي خد مرتبى وادينى مصروف البيت، وتقع الهبلة اللي ملقتش طبلة تمسكها وتطبل علي خيبيتها علي واحدة ونص ورقصنى يا جدع، وتلاقي البيه اللي اسمه رجل البيت بيديها 50 جنيه مصروف في اليوم ، وعايز منهم أكلة لحمة وفتة بالكوارع ومنبار لزوم التحبيشة، والعبيطة ساكته ، مقلتش له ايه ده يا محمدين هو حسانين جارنا مقلكش ان الدنيا غليت واسعار الاكل والشرب بقت نار ، قالها اتصرفى يا حفيظة انا مالى هو ده الموجود، قالت له المصروف ده مينفعش لأكل قطة يا محمدين ، قالها طب اعملى جمعية واقبضيها.. اهي تسد في البيت ومصاريف العيال ... الست يا عينى عليها سمعت كلامه وعملت الجمعية، قبضت الاسم الأول ، قالها فين الفلوس بتاعة الجمعية ؟ قالت له :اتفضل يا حبيبى ...حبك بورص أعور انتى وهو ، ايه الرجالة النص كم دى، المهم خد منها الجميعة ونزل علي البنك حط الفلوس في حسابه، ولم يعطيها مليم ، والعبيطة الهبلة أم بدوى بتدفع قسط الجمعية من مرتبها الضعيف، والنص كم ده ينزل ويسيبها كل يوم يقعد علي القهوة يشرب شيشة حِمى أو نرجيلة، أو حجرين تفاح، بفلوس الهبلة، لحد الفجر، طيب يا عمنا فين الوعود والورود وشهر البصل اللى قلت عليه،، النص كم يضربها طناش وميرودّش، عامل نفسه من بنها، رغم أن أولاد بنها أرجل منهٌ، والغريب بقي انه كل يوم ساقيها المر فى كباية ، لا كلمة حلوة ، ولا يدلّعها زي باقي النسوان من جيرانها او قرايبها ، ولو حاولت يا عينى تقرب منه وتدلعه يجرى منها علي القهوة ، بعد لزقها قلمين علي خدودها اللي زي الملبن، بذمتكم تبقي دي عيشة ..يا نص كم أنت متسواش ربع جنيه في سوق الرجالة.. الرجولة يعني تصرف علي بيتك ، الرجولة يعنى تستت مراتك، وتخليها هانم زي بتوع زمان، تخليها قاعدة مستنياك لمّا ترجع من الشغل، وهيا علي سنجة عشرة ، تلبس لك قميص النوم الأحمر، وتحط لك روج بنفسجى، وتستقبلك استقبال الفاتحين ، إذا كنت اصلا بتعرف! يا نص كم أنت وإلّىِ زيك حرام عليكم تبهدلوا بنات الناس الطيبين، وانت يا بت انتى ، نضفى صفايح الزبالة دى ، يا إمّا يعيش زي الرجالة ويصرف علي البيت، زى الدين ما قال ، ياإمّا تخلصى منه وبلا أرف ، جتهم ستين نيلة الإنصاص دى .. هذا المقال قصدت أكتبه بالعامية عشان النص يفهم ، يمكن يراجع نفسهٌ ويتعدل...يارب أهديه..وأختم المقال بكلام المحترم الأستاذ الدكتور مبروك عطية، الداعية الإسلامى الذى قال : إنّ الأصل في النفقة على الزوج، وليست الزوجة. وعلى الرجل أن ينفق على أهل بيته بقدر ما أتاه الله من رزق.وأنّه ليس من الخٌلق أن تساعد المرأة زوجها في الإنفاق على البيت، مشيرا إلى أن الزوجة إذا قالت لزوجها سوف أساعد معك في مصاريف المنزل فأصبح ذلك عهدا عليها والتزاما لن تتخلى عنه، ويجب أن تستمر فيه، ولذلك الأفضل أن لا تساعده حتى لا يصبح عليها العهد ويصعب عليها يوما تقديم المساعدة. ووجه الداعية الإسلامي نصيحة للزوج قائلاً: إذا عرضت الزوجة على زوجها مساعدته ماليا أنصحه "يعمل نفسه مش عايز" جاء ذلك خلال برنامج "يحدث في مصر"، المذاع على قناة "إم بي سي مصر" أمس...افهم بقى يا نص...