جريدة الديار
الجمعة 29 مارس 2024 08:59 صـ 19 رمضان 1445 هـ
بوابة الديار الإليكترونية | جريدة الديار
رئيس مجلس الإدارة أحمد عامررئيس التحريرسيد الضبع

محمد خليفة يكتب: وزارة للسعادة فى بلد الفقر فيها دمّر الغلابة!

الكاتب الصحفي محمد خليفة
الكاتب الصحفي محمد خليفة

غريب هو أمر الحكومة التى اصبح شعارها العك واللت والعجن، سعادة آيه بس اللي عايزين تعملوا ليها وزارة ، والناس مش لاقية تآكل ، غلا الأسعار نهش جسمهم ، والعضم بص من هدومهم، والفقر بقي الصاحب الوحيد لهم، يا عمنا أنت وهو وهو، دوروا علي وزارة تقضي علي الحرامية والفاسدين اللي مليان مصر، شوفوا السرقة والفساد اللي في الكرة، شوفوا حلول عمليه للبطالة، شوفواخريجين الجامعات المتفوقيين اللي مرميين علي القهاوى من غير شغلة ولا مشغلة، شوفو حل للزبالة اللي في الشوارع، يا عم أنت وهو وهو بطلوا سبابيب تاكلوا عيش وملبن من وراها، وزارة سعادة، واحنا لسا بنبني اللي هدوه الأخوان في سنة وكمان اللي اصلا كان مهدوم من 60 سنة ، وجاي تقولي بعد 7 سنين من ثورة 30/6 نعمل وزارة للسعادة، ولاَّ قصدك للتعاسة ، الناس خلاص طلعت من هدومها وباعتها كمان عشان تاكل عيش حاف، والرئيس السيسى مبينمش الليل عشان يبني اللبلد، رغم ان فيه وزارات كثيرة بتهد اللي بيبنيه الريّس .. ده غير فساد المحليات في كل حي ومجلس مدينة ، كل حاجة بقت بالرشوة، والله يكون في عون الرقابة الإدارية، مبقاش النوم يعرف طريقهم، ومش قادرين لوحدهم علي كشف الفساد اللي مليان في البلد، وبعيدين تقولي وزارة للسعادة، يا عم ياللي اقترحت السعادة روح علّم تلاميذ المدارس الأخلاق الأول، وعلّم ولادنا الكبار ان الحشيش والبودرة والاستروكس ها يقضي عليهم ، وقل لاصحاب الجامعات الخاصة، خلي عندكم دم وكفاية تسيّب في جامعاتكم، العيال بتشرب الحشيش علنى ادام وجوا الجامعات دي، وبعدين جاى تقول لي وزارة للسعادة والناس في اتعس ايام عمرها، بس صابرة عشان بتحب الرئيس، حلفتك باى حاجة عايز تحلف بيها يا شيخ، بلاش سعادة ولا يحزنون ..رخصوا الاسعار وبلاش زيادات تانى، عشان الناس لوحدها لو ده حصل ها تبقى سعيدة من غير وزارة، وبلاش تقلدو الإمارات ،لأن الدولة دي من الدول اللي عندها تخمة في الفلوس، ملقتش حاجة تعملها غير اسعاد ناسها ، مش انت بقي ناسك بتاكل من الزبالة وهدومهم مقطعة وماشين حافيين وبعدها تقول سعادة ، إللهي ياشيخ ما تشوفها في حياتك ياللى كنت صاحب الاقتراح ده ! وكان ما يسمى بالدكتور طارق الرفاعى، مدد يا رفاعى، مدير منظومة الشكاوى في المجلس اللى اسمه الوزرا، قال في تلفيزيوناتهم أنو ها يعملوا وزارة للسعادة عشان الناس تسعد وهيا بتتعامل مع اجهزة الحكومة ..الكلام ده عمنا الرفاعي قالو فى قناة صدى البلد بتاعة محمد ابو العينين صاحب السيرميكا، ورقصنا علي السيكو سيكو، علي رأى الزميل سامي صبرى الكاتب الصحفي المعروف... قال ايه بسلامته الرفاعي بيقولك الوزارة دي عشان الحكومة قلقانة وعايزة ترفع معدلات الثقا بين المواطن والحكومة ..يا عم الحاح حد قالك أنو فيه ثقا اصلا...خدمات ايه اللي عايز تعملها كويس ، هو أنت مرحتش تجرب ازاي تعمل خدمة في مصلحة حكومية، البيه الرفاعي عايش اكيد في اللي بيسموه كمباوند ده، وبيركب عربيته ام 2 مليون جنيه ومكيف ع الآخر، يا عمنا روح شوف الخرابات اللي الناس نايمة فيها، ولمّا تعيّشهم عيشة محترمة وتوفر لهم حياة كريمة ابقي اعمل ميت وزارة للسعادة، ولا كريمة دي ماتت عندكم ..طيب يا خويا البقاء لله في كريمة وأم كريمة وعيلة كريمة كمان! [email protected]