جريدة الديار
الجمعة 29 مارس 2024 04:46 مـ 19 رمضان 1445 هـ
بوابة الديار الإليكترونية | جريدة الديار
رئيس مجلس الإدارة أحمد عامررئيس التحريرسيد الضبع

موضة المدارس الخاصة

أحمد عبد العال الرفاعى
أحمد عبد العال الرفاعى

كنت أعد نفسى للكتابة فى (أكذوبة أرض الميعاد) عن اليهود وادعائتهم أو فى (الإسلام السياسى) وعرضت الأمر على شخص عزيز على لأخذ الرأى، فأشار على بالكتابة فى هذا العنوان (موضة المدارس الخاصة) فكانت فكرة أكثر من رائعة وفعلًا عملت ومازلت (من ضمن ما عملت) مدرسا للإنجليزية وكنت ومازلت شاطر فى تدريسها فى الإسكندرية.

 

وكنت طالبًا فى أشهر مدارس الإسكندرية وهى الناصرية الثانوية فى باكوس، حيث كانت أقرب المدارس إلى سكنى هى ومدرسة جمال عبدالناصر الثانوية ولم تكن خاص ولا تجريبى.. ولا حتى عسكرية وكنت من أوائل الطلبة الذين درسوا اللغة الألمانية فى الإسكندرية كلغة أجنبية ثانية.. لسنا بصدد سيرة ذاتية ولكن نتحدث عن المدارس الخاصة وعن ما وصلت إليه أحوالها.

 

وبما أننى فى مجال التدريس فطلب منى القاصى والدانى أن يلتحق أولادى بأحد المدارس الخاصة فكانت إجابتى أن المدارس الحكومية التجريبية لغات أحسن عشر مرات من الخاصة التى كان من الممكن لى إلحاق ابنتى وابنى بهم حيث كانت الميزانية تسمح "ما أنا مدرس وشاطر والأشية معدن".

 

وفعلًا كنت محق فالتجريبى لغات يشرف عليها المتخصصون وكمان تربويون عشان كده مرتبات المدرسون أعلى من المدارس العادية وكمان المصروفات أعلى قليلًا من المدارس العادية وتربت ابنتى فيها وأجادت نطق اللغة الصحيحة. حيث يشرف عليها متخصصون محترفون تدربوا فى إنجلترا وأمريكا أيام الوزراء السابقون رحمة الله عليهم أيام هوجة البعثات ودلوقتى فيه اتجاه لتوحيد المدارس لتكون كلها تجريبى لغات وتحديث المناهج وتطويرها لتتماشى مع متطلبات العصر وتجهيز المدرس بغرف للموسيقى والرسم والتربية والزراعة والتدبير المنزلى والتربية الرياضية والخطابة، ووجود أخصائى اجتماعى فاهم ويخاف الله وأخصائى نفسى.

 

ليه الناس اللى عايزين يربوا أولادهم صح بيدوروا على المدارس الخاصة عشان بقى فى فكر فى البلد بيقول أن اللى معهوش فلوس يموت وكمان اللى معهوش فلوس مايتعلمش.

 

عايزينه يركب الباص زى ابن الأستاذ اللى تحتهم شغال فى البترول ومش بيعرف يعد مرتبه وإحنا كمان مش أقل منه.

 

المدرسة الخاصة فيها جيم والواد يبقى اسمه بيروح الجيم.

 

المدرسة الخاصه الواد بيقول thank you المدرسة العادية الواد يا ولداه مابيقولش ولو فى أزهر خاص بيقول السلام عليكم.

 

بيروح رحلة والباص بيجيبه عند باب البيت وقلب أمه يرقص فرحًا

يا حلاوة يا ولاد.

 

وفى البيت اه المس قالت أو المستر قال....؟

طبعًا تجار المدارس الخاصة فهموا التركيبة دى وحددوا أسعار خيالية وصلت أنه بقت بالدولار أو اليورو ماهم بيتعملو مع محدثى نعمة أو مرضى.

بدليل طه حسين وكان أخ للعديد من الأبناء وتسبب الفقر والجهل فى فقدان بصره.

زويل وعباس محمود العقاد (الذى كتب العبقريات ومنها عبقرية محمد صل الله عليه وسلم) وآخرون ومنهم الشحات مبروك  بطل العالم ونجم مشهور.

صحيح للمدارس الخاصة مميزات ولكن هو فيه حد عنده مدرسة خاصة وعايز يحقق دخل قومى لمصر مثلًا؟!.

قلبه على ولاد الناس.. مثلًا؟ طب ليه بيدخل ولاده تجريبى لغات حكومى؟

بيجيب مدرسين متخصصين وتربويون مثلًا؟

بيدى المدرسين مرتبات زى خلق الله تكفيهم مثلًا؟ وبيديهم مكافأة أخر العام مثلًا؟

ده بيجى فى الصيف ويقول لهم هانخصم بدل صيف عشان مفيش طلبة أو يقول لأولياء الأمور فيه معسكر صيفى ويقلبهم.

ويعدى صاحب المدرسة أو ابنه فى الطرقة وإذا أى مدرس ماوقفش يخصم منه 8 سنين من مرتبه عشان ماوقفش وابن صاحب المدرسة معدى (مش ابن الأكرمين).

بيجيب مدرسين غير متخصصين ودول بيكونوا أرخص.. ماهو تاجر!!

قابلت واحد خريج تجارة ويعمل مدرس إنجليزى ومتصيت وسألنى هو شكسبير كتب كام قصة؟ أصل أنا تقريبًا درستهم كلهم وكرر نفس الموقف من شهر على أساس أنه الواد هو (شكسبير عمره ما كتب قصص شكسبير كاتب مسرحيات ويا سلام على نطقه فى اللغة... اهو مدرس فى مدرسة خاصة.

محتاجين وزير يخاف الله وممكن يحل المشكلة.

1- يرفع المصروفات ويقسمها على مدى العام كل شهر مثلًا 100 جنيه

ولدينا ملايين من الطلاب يبقى هانلم ملايين كل شهر(كده نقدر نبنى مدارس ونقلل كثافة الفصل وندفع مرتبات وتتحول الوزارة إلى منتجة بدل ماهى خدمية وكمان هنمنع الدروس الخصوصية (ولى الأمر بيدفع دروس كتير كل شهر صح!!

لو دفعناه فقط مثلًا 100 ودى هاتعمل دخل ملايين للدولة.. للتربية والتعليم.

وولى الأمر اللى مش مقتدر تدفع له الجمعيات الخيرية أو المصالح المقتدرة.

2- نرفع مرتبات المدرسين ونعين خريجى التربية.

3- نهتم جدا بالأنشطة مثل الخطابة والتربية الرياضية.

4- يهتم بطابور الصباح وتحية العلم وقراءة عناوين الأخبار والقرآن الكريم وعمل تمارين الصباح.

نهتم بفصل الطالب الذى يتغيب 30 يوم منفصلة أو 15 يوم متصلة

وننفذ ده .. هتحضر الطلبة لو عرف أن من يفصل ولكى يعيد قيده هيدفع 1000 جنيه، هتتعدل مدارسنا واللى بيدور على المدارس الخاصة هيدور على تجريبى لغات الحكومة.

احفظ مصر يارب