هالة علي تكتب : انا المقتول
انا المقتول وايه يعني
مدام بالعشق قتلاني!
ولو متلامة عن ذنبي
انا المقتول وانا الجاني!
وانا المستقوي ع الدنيا
ومش قدرالي في جناني.
بقيت مغلوب علي امري
مدام انتي اللي غلباني.
وانا العاشق...
مدام فيا النفس والروح.
وبعدك عني مش مسموووح.
مدام ف عنيكي عنواني.
ومش فارق..
لفين ويّاكي روحي تروح
ياروح معلوم ما بعدك رووح
لكن بعدك مليش تاني
انا المسجون مدام سجني
ف حضنك وانتي سجّاني.
مدام تتنفّسي منّي..
تردّيلي النفس تاني.
وأحايل ليلي ما يسيبني
انام..وان نمت صحّاني!
والوم النوم اذا خنّي
وضَمِّك وانتي ف احضاني.