امتى عرفت الحب ... بقلم: بهاء طايل
ما تقولى يا آدم امتى عرفت الحب؟
من أول ما اتنفخت فيك الروح
والا لما بدأت تشب؟
من قبل ما ابليس وسوس لك
والا لما أكلت؟
وعرفت ازاى أنه بيسكن فى القلب؟
الهام ؟ والا وحى من الرب؟
ما تقولى يا آدم
امتى عرفت الحب؟
طب لما فتحت عنيك ولقيتها قصادك
وشفت ف عينها
امال العمر
وشفت السحر
وشفت سواد الليل فى الشعر
وشفت جمال الخصر
وحسيت بالقلب بيرقص فى الصدر
اتكلمت؟
والا الكلمة وقفت فى الحلق
وفضلت الصمت
وكتابة الشعر؟
قولى يا آدم
ما انا ماشى على نفس الدرب
قولى يا آدم
امتى عرفت الحب؟
