عنتر أغا يكتب : في حضرة مولاتي
قلبك ليه قليل الذوق
وباصص عالقلوب من فوق
خلاني كرهت العشق
خلاني لعنت الشوق
بتاخدي تملي ما بتدي
وكل ما الين بتشدي
وقلبي مش مطاوعني
آهين لو قلبي دا بيدي
وبرغم الغصة مقدرش اجافيها
هقول القصة وتحكموا فيها
في حضرة مولاتي
انا كل حروفي جر
يا ماضي وحاضري وآتي
أنا عاشق أنا مضطر
اكون عراف بكفاتك
وقلبي يدق دقاتك
أنا عاشقك ومعشوقك
وعوضك عاللي يوم فاتك
في حضرة مولاتي
نرفع ايدينا لفوق
والفاتحة نقراها على قلب
بحبل الهوى مشنوق
أبعد وياخدني ليها الشوق
اعند ولابد أجي ادوق
وزي الطير ألاغيها واداديها
واطير بيها لتحت وفوق
وياما عزمت عالتوبة
ولا عاشق ولا معشوق
لكني في بحر الهوا غرقان
وف عيونها لقيت الطوق
هي القمر وانشق والنور
في شقتها كليلة تمام البدر
سميت ورقيتها
راشقة في روحي رشق
ونسيم في رقتها
ولو قتلني العشق دمي في رقبتها
دي طلتها تشفي عليل
وترسم البسمات
تشبه عروس النيل
في الوصف والرسمات
وزي النسيم يا بنية
وقلبك على دالحال
ولو كان العشق بالنية
لعاش قلبي في الهوا رحال
اخرتها تقفلي بابك
ورافضة ليه ودي
وأنا اللي ببات على اعتابك
وشايل قلبي على يدي
ونظرة ديتك عندك
قادرة ومستعفية
عشان قلبي بقى عندك
تبيعي وتشتري فيا
بتروحي وتبعتي طيفك
مين اللي قال دا غرام
وتمشي قلبي على كيفك
ولا طايقش مني كلام
وقلبك كيف فصول العام
كل يومين بيجدد
وأنا قلبي يا عيني ما نام
وغير اسمك ما بيردد
بشوف قلبك ساعات جاحد
وانا قلبي ماهوش شاحت
تعالي واقري جواباتك
ليقولوا من طرف واحد
دانا اللي نزلت بحر الهوى
قالوا الولد صياد
شفتها قلبي هوى
وبقيت أنا المنصاد
ورجعت ألم الشبك
والموج كان عالي
حسيت بقلبي انشبك
قلتلها تعالي
قالتلي لا يا جميل
ما تقدري على مهري
قلتلها بالي طويل
وغزلي على ضهري
والبحر دا لعبتي
من واحنا لسه صغار
ليه كل ما أكتب قصتي
بتروح مع التيار
وضربت ليها الودع
والكف قريته يا خال
ما يهزهاش الجدع
لو حتى كان خيال
في عنيها ليل وخمر
وسبع ليال من الغنا
والزمر لو كان بيدي
كنت أدوس عالجمر
واجيب مهرك من النياق الحمر
وييجي طيفها ياخدني من الترعة لتحت وفوق
والجامع الوسطاني مرورا بعم فاروق
وياخدني تاني عالرحبة
وعند ديوان سيدي العمدة
ابصلها بعيون شاحبه
واقول يا ريت تكون قاعده
تطل من بعيد لبعيد
وظلتها كفرحه عيد
وانا قلبي يا عيني يدق
آهين لو سلام بالإيد
قلبي راحها وهجرني
وروحي عايزة تهجرني
ولا كلمة تواسيني ولا طله تآجرني
يا بنت الناس مش قدك
سبيني اعيش
ويكفيني على يدك بقيت درويش
وعشقك عمتي الخضرا
وروحك في الغرام حاضرة
يقولولي بقيت درويش
اقول يا ريت تكون حاضرة
وتاخدني لحضره
ما فيها حد جمعه ‘سبت وحد
وطول الليل أطوف بيها
ولو لحظة تقيم الحد
برمشها المسحور وعيون نعسانه
وأقول حق وفرض
وتسجني في زنزانة
ولو في سااااابع ارض
يا ريتني مرجااااااان
المسها وتلمسني
وعشانها احارب الجان
يا البسها يا تلبسني ((حضرة مولاتي ))
