الشاعر عنتر أغا يكتب: جربت يوم لحظة آلم
الورث لعنة دا شيء أكيد
لما يكون اخوك عنيد
ممكن يطلب DNA
ممكن يقول عليك لقيط
والحضن والحب اختفى
ويظهر لك حقد ودفين
وتعيش سنين هجر وجفا
ازاي تقول أنا حقي فين
ولما تثبت بالشهود
وتقف وفرحان بالحدود
يطلع يقولك طز فيك
ولا حتى ليك في الأرض عود
تطلع وتجري عالقرابة
وهما يا عين زيك غلابة
ييجي يقولوا بالأمانة
حقك طلع يا دوب سرابة
بطول الأرض مالكش عرض
كلام نهاىي يعني فرض
وإياك تفكر في الغربب
دا مفيش شتيمة كله ضرب!
حتى ابن اخوك يطلع لأبوه
ونسي ترببك وودك
ولا حتى زيك فرحوه
النهرده جي يعضك
وقدام عيالك تنهزم
وتاخد جحود زي الرزم
ويفضحوك ويجرحوك
وحقك تاخده بضرب الجزم
وناس تقولك البنات
مالهمش ورث غير فتات
ولما اخته تتقهر
يقولها إدعي عاللي مات
جربت يوم لحظة آلم
وجرحك نازف م الوريد
وتلقى نفسك في العدم
والعدل شطه يا عين بعيد
يا ترى انت حمل كام قلم
هتنضرب م اللي خانوك
وتعيش وتشوف اللي ظلم
والناس تقوله حرام داخوك
وهو بيسرق في الغطا
فرحا أوي وبيبتسم
واخوه لو مات من الشتا
في الجنازة هيترسم
اللي سرق منك رغيف
غبي وكان شايفك ضعيف
يحلف والناس تصدقه
والأمر أكبر من سخيف
اللي كده مالهش عازه
ما تحسبوش إنه معاك
ولا حتى يمشي في الجتازة
ولا يوم يقف وياخد عزاك
لا وبيتباكي عاللي كان
ويقول أخويا اللي كان
اللي قهرني بالحيا
قهرني في موتي كمان
