في لقاء تلفزيوني.. رجاء الجداوي تكشف قصة أرتباطها بحارس منتخب مصر
في لقاء تلفزيوني اجرته الفنانة الراحلة رجاء الجداوي عام 2016 في برنامج الستات ما يعرفوش يكدبوا،كشفت فيه قصة زواجها بالكابتن حسن مختار حارس مرمي الاسماعيلي الاسبق.
قالت الجداوي:كنت مسافرة مع خالتي تحية كاريوكا للخرطوم لعرض مسرحية بعنوان روبابيكيا بدلا من زميلتي نبيلة عبيد وكان في حفلة هناك في الفندق ودخلنا الفندق لقينا مجموعة من لعيبة كورة القدم المنتخب الوطني المشارك في كأس الامم الأفريقية عام 1970 وانا ولا افهم في الكورة ولا أعرف فيها شيء.
قعدنا علي الترابيزة انا وخالتي والمرحوم فايز حلاوة الله يرحمه وجه فريق الكورة بتاع المنخب المصري يسلم علينا كلهم باستثناء واحد كان قاعد على جنب وماسك في أيده كتاب "how to learn English without teacher ".. قولتلهم مين المثقف ده اللي مسلمش علينا قالولي ده حسن مختار حارس مرمي المنتخب ونادي الإسماعيلي.
واكملت الجداوي: تاني يوم راكبة الاسانسير ركب معايا حسن وقالي شكلك النهاردة احسن بكتير من إمبارح وانتي حاطه ماكياج امبارح كنتي عامله زي البليتشو!! رديت عليه وقولتله افندم!! انت متعود تبقي ذوق كده مع الناس علي طول وسيبته ومشيت ودي كانت اول مره نكلم بعض فيها.
تاني يوم كنا في الاوتيل وكان في مجموعة من الصحفيين الأفارقة وانا كنت قاعدة علي كرسي وجه هو قعد علي رجل الكرسي فطلب منه الصحفيين الثبات لالتقاط صوره له مع خطيبته فرديت بسرعة قولتلهم ده مش خطيبي وطلبت منه أن يبتعد عني بسبب وجود الصحفيين خاصة أنهم ظنوا أني خطيبته، لأني مكنش مشهورة في هذا الوقت.
قالي: وإيه يعني ما انا هبقي خطيبك.. قولتله: انت مصمم بقي.
واحنا في رحلة العودة من الخرطوم جه وقالي تسمحيلي اقعد جنبك. قولتله: اتفضل.
وسألني: أنتي متزوجة؟ فقولت: لا، فطلب مني الزواج قولتله: انت عندك كام سنة قالي 24 سنة.. قولتله: ياه انت صغير اوي يا شاطر انا اكبر منك ب 3 سنين وبتقبض كام قالي: 55 جنية رديت بسرعة: في اليوم! ردعليه: لا في الشهر
فقولتله: أنا أريد أن أتزوج رجلاً عجوزًا يموت بسرعة وأورثه، وأنت فقير، فطلب مني أن يحضر بالبيت قائلاً: «أنا هتجوزك يعني هتجوزك».
جيش الإحتلال الإسرائيلي يقصف قطاع غزة
الخطوبة والجواز
المهم جه عندنا البيت وقابل والدتي وفؤجت انها تعرفه قولتلها: تعرفيه منين ده! قالتلي طبعاً عارفاه ده حارس مرمى النادي الإسماعيلي _الفنانة رجاء الجداوي واسرتها من مدينة الإسماعيلية_ استنيت لما دخل الحمام قولتلها:عارفة بيقبض كام 55 جنية يعني فقير قالتلي مش مهم ده الراجل اللي أطمن وأنتي معاه.. خدي الحساب بتاعي في البنك وروحي جيبي انتي وهو اوضة النوم وافرشيها في الشقة وعيشوا معايا في الشقة وتم الزيجة في ستة أيام فقط!! .
وكانت علاقتهما الزوجية من أنجح زيجات الفنانات بلاعبي الكرة واستمرت لمدة 46 عاما حتي وفاة الراحل حسن مختار عام 2015، وأثمرت عن ابنتهما الوحيدة "أميرة".
سألتها المذيعة مفيدة شيحة وقالتلها: انتي حبيتي المرحوم حسن مختار قبل ما تتجوزيه.
قالتلها: قبل ما اتجوزوا لا بس بعد ما اتجوزتوا حبيتوا اوي واضافت : أوعوا تفتكروا ان الحب اللي قبل الجواز ده حب ده بيبقي اي حاجة.. الراجل والست في فترة الخطوبة بيظهروا احسن ما فيهم لكن الحب الحقيقي انك تنتفسي نفس الأكسجين اللي بيتنفسه الانسان اللي انتي بتحبيه وانتوا علي نفس المخدة
المذيعة: طب إيه اللي شدك فيه وخلاكي متجوزها الفترة ديه كلها ؟
رديت: لقيته انسان نضيف اوي ربنا كرمني بيه وهفضل طول عمري فاكرها ومش هنساه وهفضل مراته حتي بعد ما مات.
