مكالمة الغالية

أزيك ياأمي وحشاني
الحمد لله إنك بخير طمنتيني

دا أنا من دقيقة
برن ع تليفونك قلقتيني
دقيقة تاني وكان
طار برج من دماغي

المهم أنت تمام
وسامعك وسمعاني
الله أكبر
ايوه أيوه دي ضحكتك
جت نغم في وداني

منحرمش منك
ياأمه ياعنيه
وتعيشي ليه ياست الكل ياغالية
دي الدنيا كلها بتغني
فرحانة قدامي
لما بسمع صوتك يجلجل في وداني

ولا لسه عاوزة تشوفي
وتعرفي غلاوتك يا امي عندي

يااااااه يا امي
دانت أغلى الغلاوة إللي عندي
و قلبي مفيهوش ساكن غير أمي
وكلمة وحشتيني
لو هقولهالك دي شوية
ولو هكتبها في ورقة
مش هعرف أكتبها
غير لما اكتب وراها كلمة ياااا أمي

أزيك يا غاليه يا امي عمله أيه
وصحتك أخباارها أيه

بتفطري كويس
اوعي تكوني مفطرتيش
طب فطرتي ولالسه

فطرتي...
طيب فطرتي يا امي أيه
بس كدا...
علبة زباادي

طب اوعي تكوني ماشربتيش العصير
ولا تكوني ما كلتيش م ال فطير

حتة بس كلتيها صغيرة ونص كوباية..

طب أنا ايه بتقولي
معلش التليفون صوته واطي
و لو هتعبك بالكلام تعيديه
آسف آسف سامحيني


إنت يا ابني ياضنايه:
كلت وشربت و نمت كويس

أيوة كلت ياأمي مية مية
وتقلت كمان هدومي
ما تخافيش عليه
وكل كلامك اللي بتقولوهولي
أوامر ليه

المهم انتي يا أمي
على صحتك طمنيني
هو انا اسأل بسؤال عليكي يا أمي
تجاوبيني بلهفتك بعشرين سؤال عني
أيوه سمعك قولي
بتقولي إنك بتاكلي كل حاجة حلوة
بس مرة علقم

طب ليه ألف سلامة عليكي يا أمي

ياااه ياا أمي
كل دا عشان بس أنا بعيد عنك
ربي ميحرمنيش ياا أمي منك

طب أوعي تكوني نسيت العلاج
أول مارجع ان شاء الله يا امي
هوديكي تتمشي
و تتشمسي على البلاج

دا انت الغالية والحبيبة يااا أمي
وروحي من غيرك تطير

وأوع أكون قلقتك
ولا تكون رنت تلفوني
من نومك ازعجتك

اعذريني وسامحيني
انت عارفة معرفش اعيش
وابدأ يومي
غير لما صوتك يجلجل في وداني

ياأمي يااا حببتي يخليكي ربي ليه
وتعيشي ياغالية منحرمش منك
بيوصلني والله دعاكي يوماتي ليه
مستورة دايما خطاوية
فى كل حته يقولولي سالكة ومقضية
عدي بسلام من غير أذية
مرسوم يا ابني الرضا فيك وعلى وشك
اقولهم دا من دعا امي ليه

عشت ياأمي و ربنا يرضيكي
ياست الكل والكليلة وكل ما ليه
النهردة بس بعيد عنك
وبكرة هسافرلك
هاجي طاير
اقولك وحشتيني وابوس إيدك
واقعد ف جنتك تحت رجلك

بس ليه طلب عندك
خلي بالك ياا أمي
لحد ما اجي من نفسك
وسلام عليكي
ألف ألف سلام دلوقتي
ومتخفيش عليه
الله معايه ماتخافي
ياأمي مع ألف ألف سلامة
بس مش هقفل انا السماعة
مستنيكي لما انتي اللي تقفلي
طيب مع السلامة يا ابني
ألف سلامة
في رعاية الله يا امي
استودعك ربي