محمد هنيدي داعما محمد صلاح: ما أتولدش في بقه معلقة دهب

دعم الفنان محمد هنيدي محمد صلاح نجم المنتخب المصري ونادي ليفربول بعد هزيمة فريقه في دورى ابطال اوروبا وذلك عبر صفحته الشخصية على موقع التواصل الاجتماعي فيسبوك

وقال هنيدي: عارف لما بتبقى بتلعب بلاعب في البلاي ستشين وفجأة تلاقيك بتنافسه او اللاعب بعد ما اعتزل بيحلل اداءك في التلفزيون وبيوصفك بالافضل في منطقتك في العالم.

وتابع: عشان كدة بقى عايز أقول حاجة بقالي فترة بشوف "بعض" الشباب اللي بيحاول يسخر او يقلل من صلاح يمكن يكونوا مابيحبوش صلاح او بيشجعوا فرق منافسه من حقك ماتحبش صلاح وحقك تحب فريق منافس وتشجعه بس الفكرة ليه تقلل او تكره واحد قدر يعمل اللي ملايين كانوا بيشوفوه مستحيل؟

وأضاف: صلاح اللي كان بيسافر بالقطار كل يوم وينام في النادي ع الأرض وبدون واسطة قدر يصنع نفسه من الصفر لغاية لما وصل انه بقى ينافس على الأفضل في العالم، صلاح زينا وشبهنا ماتولدش في بقه معلقه دهب، قدر يكون مثال لأي واحد بيتعب وشايف انه حلمه وهدفه مستحيل يتحقق.

واستطرد: صلاح مثال لأي شخص مجتهد وبيمر بظروف صعبة وحياة صعبة، مثال انك تقدر مش بس تكون الأفضل في بلدك، تكون الأفضل في العالم، الفكرة مش في الشخص، الفكرة في الفكرة نفسها، ان يكون عندنا شخص واشخاص طبعا في مجالات كتير تانيه زيه، قدروا يحققوا اللي انت واحنا كنا شايفينه مستحيل، فالحب والتقدير لصلاح، مش حب لشخص، حب لفكرة ونجاح ،وهار دلك لصلاح

الجدير بالذكر أن فريق ريال مدريد قد توج بلقب دوري أبطال أوروبا للمرة الـ14 في تاريخه، بعد فوزه بنتيجة 1-0 على نظيره ليفربول الإنجليزي، خلال المباراة التي جمعت الفريقين امس على ملعب دي فرانس في نهائي دوري أبطال أوروبا للموسم الحالي.