عمرو أديب يعلق على حادث قتل طالبة المنصورة

قال الإعلامي عمرو أديب: "هذه الحادثة الوحشية البشعة أمام جامعة منصور طعن وذبح طالبة على يد زميل شيء بشع وعمل هزة نفسية في المجتمع المصري".

وتابع: "اللى أنا واقف قدامه بعض الملاحظات الغريبة شوية، الأولى إن لقيت ناس ماسكة في فكرة هو ليه محدش لحقها وهو فين الأمن والأمان، طيب ما في أمريكا راجل بيدخل برشاش وبيقتل 20 واحد، ولقيت ناس بتقول البنت لابسة ومش لابسة وبتحمل المسئولية للبنت، ولقيت ناس بتتكلم عن المسلسلات والإعلام، والقاتل الحيوان اللي قتل محدش بيتكلم عنه".

ولفت: "فيه ناس كتير تميل أنه اختلال عقلي، وهذا ليس اختلال عقلي ولكن توحش ورغبة في التحكم والاقتناء وكل هذا خلاه يقدم على فعلته الدنيئة، ما حدث جريمة قتل وأهيب بالنيابة العامة أنها تتصدى لقلة الأدب اللي على السوشيال ميديا، واللي بيقولوا أصل البنت الظاهر سلوكها فيه مشكلة، اللي يخوض في عرض واحدة اتقتلت ودمها لسه منشفش، ده يتجاب من قفاه".

وأشار: "كله كوم والبيان اللى طلع من جامعة المنصورة كوم تاني بيان مخجل عن بنت من بنات الجامعة، وبيقولوا مكنش في الجامعة ده كان على الجامعة فين العزاء والمشاطرة ودعم أهلها هي دي مكنتش بنتكم، بيان مخجل ولا ينم عن دور تربوي تعليمي محترم".

وأكمل: "أرجوكم دائما دوروا على المخدرات اللى بتاكل دماغ العيال، البنت اتدبحت ويشكر إن فيه واحد قبض على الواد وهو معاه السكينة".

وتابع: "ضحية بريئة ملهاش ذنب، ولكن لقيت واحد بيقول عزيزتي الفتاة انظري لنفسك في المراَة قبل النزول من البيت، وانا برد عليه إيه القذارة دي البنت ماتت، وانا مستني من جامعة المنصورة تطلع عزاء للبنت وروح على المكان اللي اتدبحت فيه وتحط ورد وتقول دي بنتنا، اهم موضوع محدش بيتكلم فيه الواد دبحها وقتله".