نشوى مصطفى تكشف موقفا إنسانيا لهشام سليم وشيريهان

كشفت الفنانة نشوى مصطفى عن موقف إنساني للنجمة شيريهان والنجم الراحل هشام سليم عبر صفحتها الشخصية على موقع التواصل الاجتماعي فيسبوك.

وروت نشوى: افتكرت حاجة عن هشام سليم يمكن مش كتير يعرفوها فى يوم راجعة من التصوير وكان فيه أستاذة ممثلة كبيرة الله يرحمها اسمها ثريا ابراهيم قالت لى يا نشوى معنديش عربية توصلينى فى طريقك لاقرب مكان انزل اخد تاكسي، قلت لها تاكسي أزاي حوصل حضرتك لباب البيت.

وتابعت: واحنا ماشيين قالت لى عارفة الشقة اللي حتوصلينى ليها دى مين جابهالي قلت لها مين ؟؟ قالت لى شيريهان، وحكت لى انها كانت بتشتغل معاها مسرحية شارع محمد على وكانت بتيجى كل يوم من طنطا للقاهرة وترجع تانى لان بيتها كان هناك ولما شريهان عرفت قالت لها شوفى الشقة اللي تحبيها وانا حاشتريهالك ولما اشترتها كانت فرحانة اوى.

وتابعت أيضا: ولما هشام عرف بارك لها وقال لها فرشتيها ولالسه قالت له فرشتها قال لها كان نفسى افرشهالك قالت له وهى بتهزر طيب ما تعمل حاجة تانية قال لها تحت امرك، قالت له نفسى احج تانى، وفي يوم لقت شركة سياحة بتكلمها وبلغتها ان هشام سليم دفع كامل التكلفة وكانت خمسين الف جنيه وكمان وهى رايحة عطاها مصروف الرحلة وقال لها ادعى لى بس كده الف رحمة ونور.

يشار إلي أن النجم الكبير هشام سليم قد رحل عن عالمنا صباح أمس بعد صراع مع المرض عن عمر يناهز ٦٤ عاما.