ياسمين عز تحذر الزوجات وتثير الجدل .. فرعونك هيزعل …فيديو
قالت الإعلامية ياسمين عز، إن الفترة الحالية فترة إجازة وأغلب المواطنين يستغلون هذه الفترة في الترفيه، سواء من خلال السفر للساحل الشمالي أو غيرها من المدن الساحلية للاستجمام وغيره.
وحذرت "عز"، خلال تقديمها برنامج "كلام الناس"، المذاع عبر فضائية "إم بي سي مصر"، السيدات المتزوجات من واحد من الأمور التي قد تفسد متعة المصايف على الأزواج والتي تقع فيها قطاع كبير من السيدات المتزوجات، قائلة: "أوعي تاخدي حلة محشي معاكي وانتي طالعة المصيف أو طالعة الساحل، مفيش مبرر إننا ناخد محشي معانا الساحل".
وتابعت ياسمين عز: " ليه واخدة معاكي حلة ورق عنب للمصيف، إحنا قولنا بانيه متبل بالبيض والبقسماط هيقلب رائحة العربية ولكن ماشي عشان نوفر في الأسعار، والست تكون موفرة لفرعونها، الأسعار بقت غالية وأهي حاجة سريعة تتعمل ساندوتشات على الشاطئ، لكن ليه ناخد محشي معانا المصيف".
وواصلت: "هتعملي المحشي ازاي في المصيف من غير الشوربة بتاعته، هتعملي المحشي بمرقة الدجاج مش بيبقى حلو، ومن ثم فرعونك حبيبك هيزعل إن الأكل مش حلو وانتي هتقفشي، بدل ما تشموا هوا وتفرحوا مع بعض تتخانقوا وتعكننوا على العيلة كلها وتسمعوا صوتكم على المصيف كله، والموضوع يتحول لمأساة بسبب حلة ورق العنب".
واستكملت أن ورق العنب أو غيره من أنواع المحاشي من الممكن تناولها قبل السفر للمصيف، أو تخزينها ليكون طعام جاهز يتم تناوله عقب العودة من رحلة الاستجمام أو الترفيه، "مش لازم ناكل محشي في المصيف يا مدام".
وأتمت تصريحاتها: "أنا بحبك وعاوزة مصلحتك أوعي تاخدي ورق عنب وانتي مسافرة المصيف، والموضوع ده ينطبق كمان على الكرنب والبتنجان والفلفل وأي نوع محشي تاني خُلق في الوجود".
