محافظ المركزي: مش عارف ليه دماغ الناس مربوطة بالدولار (فيديو)

قال حسن عبد الله محافظ البنك المركزي: "نواجه مشكلات كتير متعلقة برفع سعر الفائدة في الفيدرالي الأمريكي إلى جانب خروج الأموال الساخنة، ونعمل علي وجود فائض في المعروض النقدي".

وأضاف خلال جلسة السياسات النقدية في ظل التطورات العالمية بالمؤتمر الاقتصادي مصر 2022: "إحنا في البنك المركزي سمعنا النهاردة وهنسمع دايما وهيبقى فيه استجابة ولكن بعد الدراسة المطلوبة".

ولفت: "حاليا احنا شغالين علي عقود التحوط للعملة وانتهينا من العقود المستقبلية، وأمريكا مش الشريك التجاري الأساسي بتاعي ومش عارف ليه دماغ الناس مربوطة بالدولار لذلك بغض النظر عن مستوى الدولار هنبتدي نعمل مؤشر الجنيه المصري هياخد بعض العملات والذهب وغيره بحيث يكون جزء من نجاحنا كلنا كمجموعة تغيير الثقافة والفكرة اننا مربوطين بالدولار، ولكنا احنا عايزين نبقى مرتبطين بكل العملات".

وأشار: "عملتنا زادت علي الليرة التركية 100% وزادت علي الجنيه الإسترليني، وزادت علي اليورو، بس الناس مبتشوفش ده كله، واحنا مش دولة مصدرة للبترول علشان يبقى عندنا سعر مرتبط بالدولار".