محمود تركي نجم ”The Comedy لــــ” بوابة الديار”: انا شخصية طموحة جداً وتجربة  “نجم الكوميديا” أقوى تجربة انا عملتها في حياتي الفنية

"محمود مصطفي تركي” الذي يبلغ من العمر 26 عام، ويعيش في محافظة الإسكندرية، تخرج من كلية الحقوق جامعة الإسكندرية عام 2015، في حوار خاص لبوابة الديار، ويتحدث عن بدايتة في مسرح الجامعة وأهم إنجازاته الفنية وتجربة في برنامج "The Comedy" نجم الكوميديا.

1_ في البداية حدثنا عن حياتك الشخصية والفنية ؟

انا إنسان بسيط جداً، من محافظة إسكندرية مواليد 93 وعندي 26 سنة، تخرجت من كلية حقوق، تخرجت من كلية الحقوق جامعة الإسكندرية عام 2015، بدأت مرحلة التمثيل من كلية الحقوق ومسرح الجامعة هو كانت بدايتي، وبدأت امثل وانا في أولى كلية، الكلام دا كان 2010، وعملت عروض كتير في مسرح الكلية وكان بالنسبالي في الأول بعمل نشاط مسرحي.

2_ كيف تري تجربة برنامج “The Comedy” نجم الكوميديا ل محمود تركي؟

تجربة “The Comedy” تقريباً أقوى تجربة انا عملتها في حياتي الفنية، اكتر حاجه قدرت اني انا أبين قدراتي الفنية أو الكوميدية فيها للناس، ودا كان واضح علي السوشيال ميديا، وردود أفعال الناس كانت حلوه جداً معايا الحمد لله، واصحابي وأهلي كانوا دايماً بيكلموني لأن البرنامج كان في لبنان.

3_ لجنة التحكيم كانت تربط بين محمد هنيدي وحسن حسني وسيرين عبد النور، من المحبب لقلب تركي ومين اكتر ممثل حسيت انك مبسوط لما اتعرفت عليه ؟

لجنة التحكيم بالنسبالي طبعاً كانت الوقفة قدامهم صعبة جداً، ثلاث قامات فنية مختلفة إذا كانت سيرين عبد النور في الغنا، محمد هنيدي في الكوميديا، حسن حسني عملاق طبعاً كبير جداً، ف دي كانت الوقفة قدامهم صعبة جداً فيه قدامك محمد هنيدي وحسن حسني كوميديان يضحكوا الوطن العربي كله، فهل هما هيضحكوا منك ولا لا، ف دي كانت حاجه بالنسبالي صعبة جداً، والحمد لله قدرت اعمل دا، وكنت كل حلقة اطورت عن الحلقة اللي قبليها، لأن كنت كل حلقة ثقتي تزيد في اللي كنت أقدمه كل حلقة، بسبب ردود أفعال الناس، وحسن حسني كان اكتر حد في اللجنة بيحبني وكان دايماً مقتنع بيا وبيشجعني في الكواليس وبيتكلم معايا وبيقولي انت دمك خفيف جداً واستمر وبصراحة هو كان اكتر شخص بيشجعني، وانا كنت بحبه جداً.

4_ ما العمل الوظيفي الذي تشغله اليوم ؟ وما مشاريعك الفنية في المستقبل ؟

انا اليومين دول بصور فيلم أن شاء الله سينما، الفيلم من بطولة راندا البحيري وندي بسيوني ومها أبو عوف ومحمد سليمان ومحمد الصاوي، فيلم أن شاء الله يكون حلو جداً، الفيلم فيه شغل عالي، وبعمل انا وميزو برنامج جديد كوميدي بنستضيف فيه النجوم ويكون علي السوشيال ميديا.

5_ الكل كان ملاحظ مدي حبك وفهمك لصديقك ميزو، احكيلنا تعرفت عليه ازاي وايه وصلكم لكمية الحب الكبيرة ؟

مبدائياً كدا ميزو صاحبي، وفعلاً انت مش اول واحد تلاحظ كدا، انا وميزو مش أصحاب احنا اخوات، لأن احنا الاتنين فاهمين بعض ودماغنا واحده، حتى لما بنيجي نشتغل مع بعض او بنحضر لحاجة بنكتبها سوا، وفية توافق ذهني ما بينا كبير جداً، انا اتعرفت عليه في برنامج “The Comedy”، مكنتش متوقع اننا هنبقا صحاب للدرجادي، انا اتعرفت عليه في نص البرنامج كان العدد بدأ يقل في المتسابقين فهو قعد معايا في الاوضة في الاوتيل اللي كنا قاعدين متواجدين فيه، من هنا بقا اتعرفنا علي بعض اكتر وبدأنا نكتب مع بعض ونفكر مع بعض، ونجود في الاسكتشات اللي كنا بنعملها مع بعض، وكان دايماً يساعدني.

6_ ما هي نقاط قوتك ؟

من اكتر الحاجات اللي انا بحبها في نفسي أو عودت نفسي عليها اني انا مش بيأس، أو انا عندي دايماً إسرار اني انا أنجح وأقدم حاجة تكون كويسة، عموماً في الحياة مش في التمثيل انا بيبقا عندي إسرار أو انا طموح انا شخصية طموحة جداً، ف دايماً انا عاوز أحقق وعاوز أنجح ودي من الحاجات اللي انا بحبها في نفسى وأتمني أن تفضل موجودة،

7_ أين ترى محمود تركي بعد خمس سنوات ؟

هي كل حاجه بايد ربنا، انا بجتهد وبعمل اللي عليا، وان شاء الله الفترة الجاية هينزلي شغلي جديد، بس انا طموحي بعد خمس سنين اني ابقا بطل عمل اي كان سوء سينما أو دراما أو مسرح، دا طموحي اني ابقا بطل عمل أن شاء الله.

8_ كيف تتعامل مع مواقف الضغط ؟

في مواقف الضغط بحاول ان دايماً اني اهزر، يعني انا 70% من حياتي بهزر مع اصحابي وبرمي افهات، من النادر مثلاً اني اتعصب او ابقي مضغوط اوي، دايماً بحاول ابقي فاكك، يعني بهرب من أي ضغط بالهزار واني اتكلم مع الناس واهزر معاهم.

9_ ما هو أهم إنجاز في حياتك المهنية ؟

اي حاجه قدمتها بستفيد منها سواء كانت سلبية أو إيجابية، يعني بعرف لو الحاجة مش حلوة بعرف المرة الجاية هاخد بالي من ايه، ولو الحاجة حلوة بتضيفلي وبتبسطني، اكتر حاجه استفدت منها “The Comedy” طبعاً استفدت منها جداً لأن فيه ناس كتير عرفتني من البرنامج، وعملت مسلسل مع أستاذ سامح حسين اسم المسلسل "سرايا حمدين" كنت عامل 25 حلقة ودا برضوا حاجه استفدت منها، وعملت برضوا فيلم "عمر خريستو"، دا كان السنة اللي فاتت كنت عامل فيه 14 مشهد، استفدت اني انا كان معايا ناس كويسة أحمد التهامي وياسر التوبجي ودومينيك حوراني واستاذ لطفي لبيب.

10_ ما نوعيه البرامج التى تفضل مشاهدتها فى التيليفزيون ؟

انا بحب أتفرج علي كل حاجة واي حاجة، سواء في الغنا أو الطرب أو البرامج أو مسلسلات، واكتر حاجه بحب اتفرج عليها "مني الشاذلي _ صاحبة السعادة _ مسرح مصر" الـ3 برامج دول بحب اتفرج عليهم جداً.

11_ من وجهة نظرك التمثيل المسرحي أقوى أم السينمائي ؟

الاتنين مهمين جداً، يعني مفيش مقارنة بين المسرحي والسينمائي، يعني انا شايف ان المسرح هو جيم الممثل، يعني الممثل لما يحب يشتغل على نفسه بيروح المسرح، يعرض مسرح شهر مثلاً، السينما تاريخ دي حاجة تحفة طبعاً، واي ممثل طلع من مسرح بيبقا قوي جداً بيبقا غير اللي طلع من سينما.

11_ فريق ينتمي له محمود تركي ؟

زملكاوي ومن صغري بشجع الزمالك.