جيلانى كساب يكتب :فى مصر ” شحات بيدور على لقمة.... وغنى بيدور على فيلا ”

2019 قولنا الحال هيبقى عال العال ، قولنا هنعيش مبسوطين ،فرحانين ، لكن الحاله اصبحت مش تمام ، كل واحد من 100 مليون عايش فى حال غير الحال ، اللى مديون علشان يعيش ، واللى خايف يأكل علشان ميلقيش لقمة ثانية ، الاب بيخاف من كلمة " احنا اخدنا اجازة وعايزين نصيف " ماهو صحيح هيعمل ايه يسرق يعنى ولا يروح يشحت ، ههههه يشحت ، اذا كان الشحات نفسه بيدور على لقمه ، اصل الناس دلوقتى خلاص معندهاش فلوس توزعها ، الام يعنى بتدبر اللقمه بالعافية ، شوية طماطم فى الثلاجة البايظه ، او تستلف من جارتها شوية بطاطس ، علشان يعنى تعمل لقمة على البوتاجاز قبل الانبونة متخلص ، لان سعر الانبونة وصل 70 جنيه ، والشاب من دول نفسه يشتغل بشهادته او حتى من غير ، يشتغل اى حاجه ، المهم يعيش ،مش هنقوله بقا شوف بنت الحلال ، ياااااا ده حلم اصبح مستحيل ، وشوف يا جدع بقا النص الثانى فى مصر ، نص الشروق والتجمع الخامس ومدن البهوات ، تلاقى هناك الفيلا بتبدأ من 9 مليون وانت طالع ، فى مصر شحات بيدور على لقمة، وغنى بيدور على فيلا .