عم يا ابتاع الروبابكيا.. بقلم/ وحيد عيادة
. -
يا عم يا بتاع الروبابكيا
شوفلنا ناس أنتيكا
شوف قلوب سكتها سالكة
شبه ستي و ستك
لابسة توب الجدعنة
حتي لو ماشية حافية
تعبنا م الناس السيليكون
اللي مليانة وشوش
و اللي عسل كلامها سم
و اللي تبيعك ب تلت قروش
دول أصلهم بشر
من فصيلة الوحوش
يا عم بتاع الروبابكيا
شوفلنا ناس بتوع زمان
ناس كانت بسيطة
تدعيلك من قلب تمام
ناس كانت جنب بعضها
لو جارها جيعان ما تنام
ينفع تاخد الناس الجديدة
و ترجعلنا الناس القديمة
وحياة ابوك يا شيخ
زهقنا من ناس شخاشيخ
وحشونا الناس القيمة
اللي ناس بصحيح
دا الناس الجديدة
الألف منهم
ما يساويش واحد صحيح