شريفة ماهر تكشف تفاصيل أزمتها مع أبنائها: ضربوني وشتموني
قالت الفنانة شريفة ماهر، إنها تحمل الجنسية السويدية، لكنها تفضل الإقامة في مصر دائمًا: «مش بطيق أقعد هناك شهر، والسويديون بيحبوا السيسي وبيقولوا لي ديموقراطي، ربنا يديله الصحة، قعدت مع جميع ملوك العرب مشفتش حد بيتعامل مع الأطفال زي الرئيس السيسي، ربنا إدانا الرئيس السيسي هدية».
وتطرقت خلال حوارها مع الإعلامية بسمة وهبة مقدمة برنامج «90 دقيقة» على قناة «المحور»، إلى خلافاتها مع أبنائها، موضحةً: «وزعت جزء كبير من ميراثي، شريف وطارق شتموني، شريف زقني مرتين ودراعي اتكسر من 4 سنين، ولادي أخدوا كل اللي حيلتي، وشريف قالي هقلعك هدومك».
وحول ابنتها ناهد، قالت: «مش حنينة وقلبها جامد عليّ منها لله وقلبها أجمد من إخواتها ومسألتش عليّ، وشريف وهو طول عمره بيحب الفلوس أكتر من أبوه وأمه، بيعبد القرش».
وأشارت، إلى أنها اعتزلت الفن وارتدت الحجاب منذ 45 عاما، وأطلقت الكثير من المشروعات العقارية: «في فيلم أعز الحبايب شكري سرحان ضربني بالقلم وعيني جابت دم، ومبقتش أشوف كويس وشريف استغل الحكاية دي وكان بيمضيني على العقد وكتير أوي، مضاني على 4 عقود معرفش فيهم إيه».
وتابعت: «مش هشتكيه وربنا هيجيب لي حقي، وطلب مني يروح يقعد معايا في شقة جاردن سيتي، ومضاني وأنا مش بشوف على حاجتي مش بتاعتي وهي الشقة دي الإيجار، وأبوه قبل ما يموت قالي هأمنك عشان شريف لما هموت هيقلعك هدومك وفعلا طول عمره بيعبد الفلوس ومكنتش أتخيل إنه يعمل فيّ كده، بقاله 9 أشهر مقاليش انتِ فين».
ولفتت، إلى أنه طردها من شقتها التي كانت تقيم فيها بمنطقة جاردن سيتي بنظام الإيجار: «قاعدة في العمارة بتاعتي في المهندسين وكاتباها باسم بنتي نيفين، وحد قالي إن شريف طلب الفيلا من الشهر العقاري رغم إن نيفين مسجلاها، وفعلا استولى عليا شريف خان الأمانة».
أول مواجهة بين شريفة ماهر ونجلها على الهواء مع بسمة وهبة
وبكت الفنانة شريفة ماهر، على الهواء، خلال حوارها مع الإعلامية بسمة وهبة مقدمة برنامج «90 دقيقة» على قناة «المحور»، بعدما أجرت مقدمة البرنامج مداخلة هاتفية مع نجلها الذي اتهمته بضربها وسبها والاستيلاء على أملاكها مستغلا قلة حيلتها وضعف نظرها.
وقالت: «الله لا يكسبك يا بعيد، ورينا الأوراق مش الكلام أنا مش مضيت لك على حاجة، انت اللي مضيتني، انت سلطت البواب عليّ وبيقوله ميجيبليش حاجة وبيقول للناس إن عندي زهايمر، حسبي الله ونعم الوكيل فيك، ربنا ينتقم منك».
ليرد عليها نجلها، قائلًا: «عارف إن الجنة تحت أقدام الأمهات، مش ممكن أشتمها وإيدي تتقطع قبل ما أمدها، لكني اشتريت الشقق اللي عليها المشكلة وعامل صحة توقيع منذ 2007 والمهندس الذي بنى العمارة معها شهد على هذه العقود».
لترد عليه والدته: «مزورة وهسجنك»، وعقب، قائلًا: «بتقول بايعة لبنتها منذ عام 2011، وإزاي هغير عقد البيع اللي هي بايعاه، إديتها فوق المليون جنيه وفوق الـ100 ألف جنيه سمسرة في الفيلا التي باعتها».
وصرخت الفنانة شريفة ماهر في وجهه، قائلةً: «يا كداب، انت بتصلي انت؟! انت كداب وضلالي ربنا ينتقدم منك يا بعيد وربنا يوريني فيك يا بعيد ربنا هينتقم منك يا بعيد يا حرامي».
وأكد شريف، أن أمه حررت محضرا ضده واتهمته فيه بالضرب والشتم وكسر الشقة دون وجود أي إصابات، وهو ما يتضارب مع روايتها الآن التي تقول فيها إنه تسبب في كسر ذراعها منذ 4 سنوات، موضحًا أن النيابة حفظت المحضر.
وأتم: «باعت شقتي لحد تاني ومرضتش أعمل محضر فيها ولحد الشهر اللي فات بعتلها لحمة وفراخ وأرز ومكرونة وببعتلها مؤن تكفيها شهر كامل»، لترد عليه والدته: «رمتهم».