ننشر اعترافات المتهم الرئيسي في ”رشوة الصحة” (مستندات)
حصلت «الديار» على نص أقوال محمد عبد المجيد الأشهب، المتهم الرئيسي في قضية رشوة وزارة الصحة واستخدامه نجله، في إنهاء اتفاق الرشوة الذي وقعه مع ملاك مستشفى مخالف، لاستخراج تراخيص تشغيله.
ويدلي المتهم باعترافات تفصيلية عما حدث، فإلى نص التحقيقات:
- اسمي محمد عبد المجيد محمد حسين الأشهب - السن ٥٨ سنة موالید ۲۳ ۱۰ 1963 - أخصائي أول بشركة مصر للتأمين عن الحياة.
س/ ما قولك فيما هو منسوب إليك من اتهام؟ " تلونا عليه الاتهام المبين بصدر المحضر؟
ج/ محصلش وأنا مليش علاقة بصلاح محمد قاسم ومستشفى دار الصحة اللي كان كلمني عليها الدكتور سيد عطية الفيومي واللي كان قالي إن الورق بتاعها جاهز وخلصان پس محتاج معاينة من قطاع العلاج الحر في وزارة الصحة والقطاع مش راضي يستلم الورق علشان ينزل معاينة وساعتها كلمت سيف ابني الكبير علشان لو يعرف حد هناك يكلمه علشان ينزلو المعاينة ويراجعوا ورق المستشفى ومش عارف سيف كلم مين بس اللي عرفته بعد كده إن لجنة المعاينة نزلت للمستشفى وعملوا المعاينة بتاعتهم والموضوع ده أنا مطلبتش ولا أخدت أي مقابل ليه ولا أعرف صلاح محمد قاسم أصلاً، ومن البداية أنا من مواليد ١٩٦٣/۱۰/۲۳ كفر شكر بس حياتي كلها كانت في القاهرة في منطقة حدائق القبة والدي كان بيشتغل صاحب مكتب استيراد وتصدير ووالدتي كانت ربة منزل وفي ابتدائي كنت في مدرسة الطاهرية والاعدادي كنت في مدرسة الحسنية الإعدادية والثانوي كنت في مدرسة الحسنية الثانوي وبعد كده دخلت كلية التجارة جامعة عين شمس واتخرجت منها سنة 1985 ودخلت الجيش قضيت فيه سنة ولما خلصت الجيش اشتغلت فترة في هيئة النقل العام واللي فضلت فيها لحد سنة 1993 وفي السنة دي دخلت مسابقة للتعيين في شركة مصر للتأمين ونجحت في المسابقة وإستلمت عملي في 1994/8/6 وأستمريت في الشركة حتى تاريخه لحد ما وصلت لدرجة أخصائي أول درجة أولى.
وأضاف :"وبالنسبة لحياتي الاجتماعية فأنا تزوجت في ١٩٩٣/١/5 من الدكتورة / هالة مصطفى السيد زايد وفي الأول كنا عايشين في بنها لحد ١٩٩٩ لما نقلنا الإقامة للقاهرة في مساكن شيراتون وساعتها كنت أنا بشتغل في شركة مصر للتأمين وزوجتي الدكتورة هالة كان تم نقلها لقطاع الدعم الفني في مكتب وزير الصحة وربنا رزقني منها بولدين الكبير سيف عنده ٢٨ سنة وهو خريج هندسة بترول الجامعة البريطانية وبيشتغل في البنك المركزي، والتاني خريج هندسة قسم عمارة الجامعة البريطانية وبيشتغل في مكتب هاني سعد للاستشارات الهندسة، وطول عمري في شغلي ومليش علاقة بشغل زوجتي واللي بقت في ٢٠١٨/٦ وزيرة الصحة المصرية حتى تاريخه وعملي داخل شركة مصر للتأمين منضبط وعمري ما تم توقيع عليها أي جزاء تأديبي لأي مخالفة في العمل ودائماً بتكون التقارير السنوية بتاعتي بدرجة امتياز".
وأوضح: “علاقتي بالدكتور سيد عطية الفيومي بدأت سنة ٢٠١٧ وكانت نشأتها إني بعد ما حصلت مشكلة خالد يوسف اللي كان عضو مجلس النواب عن دائرة كفر شكر وسفره لفرنسا وقتها أنا بدأت حملة انتخابية على أساس إني أترشح وقت فتح باب الترشيح للمقعد الخالي وفكرة الترشح للإنتخابات البرلمانية كانت بدأت معايا من دورة ٢٠١٥ لكن مكملتش وأنسحبت بعد إعلان خالد يوسف ترشحه لإن هو أكثر شهرة لكن بعد المشكلة اللي حصلتله أنا شوفت إن الفرصة متاحه قدامي وبدأت في الدعاية الانتخابية للحملة بتاعتي واللي إعتمدت فيها على تاريخ عائلتي خصوصاً وإني خالي الله يرحمه كان نائب عن الدائرة من سنة 1976 حتى وفاته في ٢٠١٤ ده بالإضافة إلى إني اعتمدت على التواجد وسط الناس في القرى والتواصل معاهم وكان مقر الحملة الانتخابية بتاعي في المقر القديم بتاعي اللي هو في قرية أسنيد مركز كفر شكر، وفي مرة من المرات وأنا متواجد في مقر الانتخابي جالي الدكتور سيد عطية الفيومي واتعرف عليا وأنا كنت أعرف عيلته لإن ليهم تاريخ في الترشح في الانتخابات البرلمانية ولما أتعرفنا على بعض صارت ما بينا علاقة صداقة واللي بقت تتوطد كل فترة واللي استمرت حتى تاريخه، وكان الدكتور سيد الفومي بيساعدني في الحملة الانتخابية بتاعتي وبيمر معايا في القرى وهو أصلا طبيب أنف وأذن وحنجرة وصاحب مستشفى الفيومي في مركز طوخ ومستشفى الفيومي في العبور والعلاقة ما بينا أنا وهو رغم قوتها لكن ملهاش علاقة بالأسرة بس لما الدكتورة هالة زايد زوحتي أصبحت وزيرة الصحة المصرية في شهر ٢٠١٨/٦ هو كان عارف إنها زوجتي ومش هو بس ده ناس كتير عارفة الموضوع ده لإن كان في فترة زي ما قولت كنا مقيمين في بنها والناس كلها كانت عارفة مين مراتي ولما بقت وزيرة الصحة الناس كلها عرفت، وعلشان كده بقت الناس تطلب مني طلبات في وزارة الصحة وكانت كلها عبارة عن إن دكتور عايز يتنقل من مكان لمكان أو إن في شخص مريض محتاج إنه يدخل مستشفى وكنت بقول لزوجتي الدكتورة هالة زايد وهيا اللي كانت بتتصرف في الموضوعات ديه”.
وأضاف :"وكان من ضمن الناس اللي بتطلب مني خدمات عادية زي اللي أنا قولت عليها دلوقتي الدكتور سيد عطية الفيومي واللي برده كنت بقول لزوجتي علشان تخلصهاله وعمري ما عملت الخدمات ديه لحد سواء كان الدكتور سيد الفيومي أو أي حد تاني بيكلمني بمقابل وكلها كنت بعملها الله لدرجة إن كان في ناس بتصل بيا على تليفوني المحمول وتطلب خدمات وزارة الصحة زي اللي قولت عليها وأنا الناس دي ميكونش أعرفها وبرده بساعدهم وهما أصلا مش بيكونو حتى من محافظتي وزي ما قولت الطلبات دي كلها كنت بقول للدكتور هالة زايد علشان هيا اللي بتخلصها لحد لما انفصلت أنا وهيا عن بعض في ٢٠٢١/٦/٦ وده اللي خلاني لما الدكتور سيد عطية الفيومي اتصل بيا وقالي على موضوع مستشفى دار الصحة اللي في التجمع الخامس أنا كلمت سيف إبني علشان لو يعرف حد في الوزارة يخلصلهم الموضوع والموضوع ده بدايته كانت من حوالي شهر تقريباً لما لقيت الدكتور سيد الفيومي واللي ميعرفش بموضوع الانفصال اللي بيني وبين الدكتور هالة زايد ولقيته بيتصل بيا وبيقولي إن في ناس عندهم مستشفى اسمها دار الصحة في التجمع الخامس وان الناس دي ورقها كامل وسليم بس في تعنت معاهم من قطاع العلاج الحر وإنهم مش عايزين يستلموا الورق الخاص بالتراخيص بتاع تشغيلها وأنا مسألتوش عن تفاصيل المشكلة وكل اللي قاله ليا اللي أنا قولته في التحقيق دلوقتي وحتى أنا معرفش مين هما أصحاب المستشفى ومسألتوش ولا هو قالي هما مين بس بعد ما قالي على المشكلة دي أنا كلمت سيف الكبير وانا كلمته على الكبير مش لسبب تاني وسألته إذا كان يعرف حد في الوزارة في قطاع العلاج الحر ولا لا علشان يشوف ورق مستشفى دار الصحة ويراجعوه ويخلصلهم التراخيص ولما كلمت سيف قالي إنه هيكلمهم بس محددليش هيكلم مين بالظبط علشان ينزلو لجنة بحث للمستشفى ولقيت بعدها سيف بيكلمني وبيقولي المندوب بتاع المستشفى يروح لواحد إسمه أحمد يحيى وده دكتور قطاع العلاج الحر بس مش عارف منصبه إيه بالظبط علشان يستلم منهم الورق بتاع المستشفى وينزلهم لجنة للمعاينة والكلام ده أنا بلغته للدكتور سيد عطية الفيومي والكلام ده كان حوالي من أسبوعين أو ثلاثة مش فاكر بالظبط في مكالمة تليفونية بيني وبين الدكتور سيد عطية الفيومي".
وأوضح:" ومن بعدها بقى الدكتور سيد عطية الفيومي يكلمني في التليفون ويقولي إن لجنة المعاينة لسه منزلتش وكنت برد عليه واقوله هراجع سيف إبني وهكلمك وفعلا كنت بكلم سيف وكان سيف يقولي هيكلمهم وبعدها يكلمني تاني ويقولي إنه كلمهم في الوزارة وإنهم هينزلوا المعاينة وكنت ببلغ الكلام اللي بيقوله سيف للدكتور سيد عطية الفيومي ومن حوالي عشرة أيام الدكتور سيد إتصل بيا في التليفون وقالي إن لجنة المعاينة نزلت مستشفى دار الصحة وإنهم عندهم ملاحظات عن المستشفى وإن أصحاب المستشفى هينفذوا الملاحظات وأنا قولتله ساعتها بعملوا الملاحظات ويبعتوا للوزارة ومش فاكر إن من بعد المكالمة دي حصل أي حديث بيني أنا والدكتور سيد عن مستشفى دار الصحة تاني وفي الوقت بتاع موضوع مستشفى الصحة اللي انا قولت عليه دلوقتي في التحقيق كان عندي أزمة في السيولة المالية وكان عليا شيك بمبلغ 400 ألف جنيه مستحق لشركة أزار اللي أنا شاري فيلا عندهم بـ ۱۲ مليون جنيه قسط على تسع سنين ومن ضمن الأقساط الشيك اللي أنا قولت عليه دلوقتي واللي كان معاده تقريباً حان".
س : ما الذي أسفر عنه تفتيش محل سكنك؟
ج : هما أخدوا من الشقة طلبات قديمة بتاعت ناس كانوا مدينهالي بس أنا مش فاكر هيا كانت تبع إيه
ملحوظة : حيث قمنا بفض محتوى الحرز الثابت وصفه وبيانه بالملحوظة رقم 1 بمحضر ضبط المتهم وذلك بعد أن تأكدنا من صحة بياناته فألفينا بداخله هاتفين محمولين كلاهما ماركة IPHONE الأول فضي اللون من الخلف والثاني زهري اللون من الخلف وبعرضهم على الماثل قرر ملكيته للهاتفين المحمولين المعروضين عليه. تمت الملحوظة
ج : التليفونات دي بتاعتي واللي ظباط الرقابة الإدارية خدوها مني لما اتقبض عليا.
س : أياً من الهاتفين المعروضين عليك الأن جرى عليه استقبالك ايصالات التحويل البنكي من المدعو محمد أمين كما قررت بالتحقيقات ؟
ج : هي جاتلي على التليفون الأيفون الزهري واللي أنا مسجله باسم محمد أمين
ملحوظة : حيث قمنا بفض محتوى الحرز الثابت وصفه وبيانه بالملحوظة رقم ٢ بمحضر ضبط المتهم وذلك بعد أن تأكدنا من صحة بياناته فألفينا بداخله عدد من الطلبات المقدمة للسيدة الدكتورة هالة زايد وزيرة الصحة والتي جاء جزء منها مطبوع على ورق الفلوسكاب بالحبر الأسود والبعض الآخر مدون بخط اليد، كما تبينا وجود عقد بيع دراجة نارية ورخصة تسيير خاصة بها وقد تبينا أن المتهم دون إسمه بذلك العقد بحانة المشتري وبعرض تلك الأوراق جميعها الماثل قرر بأن تلك الأوراق قد جرى ضبطها من منزله بمدينة نصر.. تمت الملحوظة
س : ما صلتك بالأوراق المعروضة عليك الآن ؟
ج : دي طلبات قديمة كانت الناس مدينهالي علشان زوجتي الدكتورة هالة زايد تخلصهلهم وزي ما حضرتك شايف إنها طلبات نقل من مستشفى لأخرى وانتداب وبخصوص عقد المتوسيكل ده أنا كنت أشتريت الموتسيكل ده في ٢٠٢١/٩/15 لإنه أسهل في التحرك في وقت الزحمة عن عربيتي المرسيدس.
س : ما قولك فيما جاء بمحضر ضبطك المسطر بمعرفة هيئة الرقابة الإدارية والثابت به ضبطك بتاريخ ٢٠٢١/١٠/٢٥ من شارع أبو الفدا بمنطقة الزمالك ؟
ج : أيوه الكلام ده حصل.
س : ما قولك فيما جاء بمحضر ضبطك أنه بتفتيشك وتفتيش مسكنك عثر على المضبوطات المعروضة عليك الأن ؟
ج : أيوه الكلام ده حصل بس كمان هما أخدوا مني مبلغ 1350 جنيه مصري وكارت إنتمان للبنك الأهلي وكارت ائتمان لبنك عودة ومفتاح العربية والمحفظة.
س : ما قولك فيما جاء بتحريات هيئة الرقابة الإدارية والتي توصلت إلى طلبك وأخذك مبالغ مالية على سبيل الرشوة من صلاح محمد قاسم بوساطة كلاً من السيد عطية إبراهيم، وحسام الدين عبد الله فودة مقابل استعمال نفوذك لدى مسئولي وزارة الصحة والسكان الحصول على قرار بإصدار ترخيص تشغيل مستشفى دار الصحة ووقف تنفيذ قرار الغلق السابق لها ؟
ج : الكلام ده محصلش والترخيص بيكون بناء على لجنة معاينة بتنزل وبتراجع المستشفى ولما نزلت اللجنة طلعت ملحوظات عليهم وأنا مليش علاقة لا بصلاح قاسم ولا بحسام فودة.
س/ هل ما زلت على أقولك التي قررتها بجلسة التحقيق السابقة ؟
ج/ ايوة انا علي اقوالي اللي قولتها في الجلسه اللي فاتت .
س/ ماهي غاية مؤهلاتك العملية ؟
ج/ انا حاصل علي بكالريوس تجارة من جامعا شمس دفعه ١٩٨٥
س/ ما هي طبيعة عملك تحديداً ؟
ج/ انا بشتغل اخصائي اول جودة بشركه مصر لتامينات الحياة.
س/ ما هي الطبيعة القانونية للشركة محل عملك؟
ج/ هي شركة قطاع عام وبتتبع شركة مصر القابضة للتامين ونخضع في الاشراف الي وزاره قطاع الاعمال العام ووزاره الاستثمار واموالها اموال عامة والموظفين اللي فيها موظفين عموميين .
س/ ما هو نشاط الشركة محل عملك "
ج / الشركة نشاطها التامين على الحياة بالنسبة للاشخاص اما التأمين العام اللي هو زي التامين على السيارات والمنازل والمصانع وغيرها مدة نشاط شركة مصر للتأمينات العامة وانا ماليش علاقة بشركة مصر للتأمينات العامة .
س/ وضح لنا تدرجك الوظيفي بشركة لتامينات الحياة ؟
ج/ انا اتعينت في الشركة دي سنه ١٩٩٤ وبدأت في الاول في وظيفة اخصائي تالت وبدأت اتدرج الى اخصائي ثاني وحاليا انا على درجه اخصائي اول واللي بتعادل درجه المدير العام.
س/ متي جري شغلك وظيفة اخصائي أول بالشركة محل عملك؟
ج/ انا اترقيت لدرجه اخصائي أول في سنه ٢٠١٤ پس مش فاكر التاريخ بالتحديد
س/ ما هي اختصاصاتك الوظيفية تحديدا ؟
ج/ انا اخصائي اول في قطاع الجودة منذ ٢٠١٧ وحتى تاريخة وده القسم المسئول عن مراقبة الجودة والوقوف على مدى تطبيق سياسات الجودة داخل مقرات الشركة وفروعها المختلفه.
س/ ما هو النطاق المكاني لذلك الاختصاص ؟
ج/ الاختصاص المكاني لقسم الجودة اللي انا بشتغل فيه ممتد لكل فروع الشركة في اي مكان بس في الوقت الحالي ونظراً اني سني كبر فبقي شغلي بيكون في منطقة القاهرة .
س/ ما كيفية مباشرتك لذلك الاختصاص ؟
ج/ في معايير موضوعه للجودة واللي صادرة من الشركات المانحه بشهاده الجودة اللي بتسمي الايزو والمعايير دي هي اللي انا في مباشرة عملي براجع مدي توافرها من عدمة وبنعد تقرير بيتم عرضه على رئيس مجلس ادارة الشركه للتوجيه لاستيفاء هذه المعايير في إطار مباشرتك ذلك الاختصاص الوظيفي .
س/ هل تضطلع باستلام أية مبالغ مالية أو شيكات أو تحويلات بنكية من المتعاملين مع الشركة محل عملك ؟
ج/ لا خالص لان انا ماليش اي تعامل مع العملاء مباشرة منذ ٢٠١٧ بعد ما تم نقلي لقسم الجودة وزي موضحت ان شغلي المراقبة والتفتيش على معايير الجودة داخل مقرات الشركة وفروعها.
س/ ما هي مصادر دخلك ؟
ج/ انا مصادر دخلي عبارة عن الراتب الشهري اللي بقبضه من الشركة بالاضافه الي حافز بينزل كل 3 شهور للعاملين في الشركة بالاضافه الي ان الشركة في المناسبات اللي زي المولد النبوي والاعياد بتصرف مكافات للعاملين بالاضافه كمان ان في آخر كل سنه بيصرف مكافاه سنوية للعاملين في الشركة وكمان عندي شهادة في بنك عودة .
س /كم يبلغ ذلك الدخل ؟
ج/ المرتب الشهري اللي بقبضه من الشركة هو 16 الف جنيه والحافز اللي بينزل كل 3 شهور بيكون تقريباً 30 ألف جنيه ومكافأه الارباح اللي بتكون في آخر السنه متغيرة بس السنه اللي فاتت نزلي ٢٧ الف جنيه بعد خصم فوايد القروض اللي انا واخدها من مكافأة نهاية الخدمه بتعني لاني من وقت ما تميت ال50 سنه وانا كل سنه باخد قرض من مكافاه نهايه الخدمه وآخرهم كان السنه اللي فاتت بمبلغ 160 الف جنيه ده غير الضرايب اللي بتتخصم وكمان الشهادة اللي عندي في بنك عودة ب500 الف بتجيب كل شهر حوالي 5 آلاف جنية.
س/ ما هو وجه تصرفك فيما اقترضته من أموال من مكافاه نهايه الخدمة ؟
ج / انا القروض اللي اخدتها كنت بشتغل بيها في اني ممكن اجيب عربيه وابيعها او اجيب شقه وابيعها وكمان انا لحد من سنتين او تلاته مش فاكر بالظبط كنت بضارب في البورصه مع شركة جلف للسمسرة وشركة بايونير وشركة مباشر للاوراق المالية بس انا زي مقولت بقالي سنتين او ثلاثه مش بضارب في البورصة .
س/ ما هي مصادر دخل اسرتك الشهري ؟
ج/ الاسرة كلها بتعتمد في دخلها الشهري على المرتب اللي بيتقاضوة سواء زوجتي الدكتوره هاله مصطفي السيد زايد اللي هي وزيرة الصحة أو ابني سيف وبيشتغل في البنك المركزي او ابني الثاني شريف اللي بيشتغل في مكتب هاني سعد للاستشارات الهندسية .
س/ كم يبلغ ذلك الدخل ؟
ج/ انا مش عارف الدخل الشهري بتاعهم كام بالظبط
س/ متى كانت زيجتك بالدكتورة/ هاله مصطفى السيد زايد ؟
ج/ احنا اتجوزنا في 5 يناير ١٩٩٣ بس حاليا منفصلين.
س/ وما الفترة التي استمرت خلالها تلك الزيجة قائمة ؟
ج/ استمر حتي ۲۰۲٠/٦/٦ بس ده غير معلن لاي حد .
س/ في إطار تلك الزيجة ما مدي مشاركتما في أية أصوالاً منقولة أو ثابتة او حسابات بنكية ؟
ج/ لا كل واحد فينا ليه حساباته واملاكه المفصوله عن التاني ومفيش اي اشتراك ما بينا في
اي حاجه .
س/ ما مدي مشاركتك وأي من أولادك في أية أصوال منقولة أو ثابتة أو حسابات بنكية ؟
ج/ لا انا حساباتي واملاكي بتعتي محدش بيشاركني فيها.
س/ ما هي الأصول العقارية التي تمتلكها ؟
ج/ مقدم التعاقد تقريبا 3 مليون جنيه بس اللي دفعته من القيمة دي كان مليون و800 الف جليه .
س/ كيف جري تدبيرك ذلك المبلغ ؟
ج/ مبلغ مليون و 100 الف جنيه انا كنت ديرته من شغلي مع شركة الخضر تراست لتجاره الخردة وكان الشغل عبارة عن تقديم استشارات مالية بخصوص شرائهم مخالفات الخردة الخاصة بشركة كهرباء حلوان وتمثيلهم في جلسة المزاد العلني والمبلغ ده كان اتعابي في الشغل معاهم وحتى في الأول كان بشيك بنكي وبعد كدة اخدوه مني وعملو التحويل على حساب شركة اذار وانا لسه ليا فلوس عند شركه الخضر حوالي 10 مليون جنيه بقيت اتعابي ولسه مخدتهمش وفيه عقد استشارات مالية بيني انا وهما وال100 الف جنيه الباقيين انا دبرتهم من اتفاقي على بيع شقه مدينه نصر للاستاذ محمد امين بمبلغ 800 ألف جنيه واللي حول منهم ٤٠٠ الف جنيه لحساب شركه آذار و ۲۰۰ الف لحسابي الشخصي واتفقنا على كتابه العقد فور سداد كامل التمن .
س/ ما هي مواعيد استحقاق اقساط تلك الوحدة ؟
ج/ الاقساط سنوية بموجب شيكات بنكية انا قدمتها للشركة
س/ ما هي قيمة كل قسط ؟
ج/ مليون جنيه مصري .
س/ على أي بنك جرى سحب تلك الشركات ؟
ج/ انا سحبت الشيكات على بنك عوده .
س/ ما هي علاقتك ببنك عودة ؟
ج/ انا عميل في بنك عودة من حوالي ١٢ سنة
س/ ما نوع الحساب الذي تمتلكه بذلك البنك ؟
ج/ انا عندي حساب جاري بالاضافه للوديعة اللي بقيمة 500 ألف اللي قولت عليها قبل كدة.
س/ هل من حسابات أخري تمتلكها بأي من البنوك العاملة بجمهورية مصر العربية ؟
ج/ انا عندي حساب في البنك الاهلي وده الحساب اللي بقبض عليه كل مستحقاتي من شركة مصر لتامينات الحياة وده حساب توفير وعندي كمان حساب جاري في نفس البنك
س/ هل من أخرين يشاركونك في التعامل على تلك الحسابات ؟
ج/ لا الحسابات دي بتعتي انا فقط .
س/ ما هو وجه استخدامك لتلك الحسابات البنكية ؟
ج/ انا استخدامي للحسابات بيكون للسحب والايداع ومفيش اي استخدام تاني للحسابات بعمله ولا حتي بقوم باي تحويلات بنكيه وما استلمتش أي تحويل بنكي غير مره من شركه الخضر تراست وده كان في ۲۰۲۱/۸/٢٥ وكان بمبلغ 600 الف جنيه علي حسابي اللي في بنك عودة والبنك عنده نسخه من العقد اللي بيني وبين شركه الخضر علشان المبلغ المحول واستقبلت تحويل تاني علي نفس الحساب اللي كان بمبلغ ٢٠٠ الف جنيه الشهر ده اللي هو ۲۰۲۱/۱٠ من محمد امین وده عربون بيع الشقه بتاع مدينة نصر وده مثبت في ايصال التحويل اللي باعتلي صورتة على الواتساب
س/ ماقولك فيما جاء بتحريات هيئة الرقابة الادارية والتي توصلت إلى حرصك علي اخفاء جزء من مبالغ الرشوة التي أخذتها وكان ذلك عبر تحويلات بنكيه من حساب شركة مجموعة الإستثمار الصحي لصالح الشركة المصرية الألمانية لأستثمارات حتى لا تظهر أي تعاملات مباشرة بينك وبين أيا من ملاك مستشفى دار الصحة ؟
ج/ الكلام ده محصلش وال600 الف جنيه ده جزء من تمن الشقه اللي انا بعتهاله بتاعه مدينه نصر
س/ما قولك فيما اضافته تحريات هيئة الرقابه الاداريه من طلبك تحويل جزء آخر من مبلغ عقد بيع شقة الرشوة محل طلبك واخذك الى حسابك الشخصى مدعيا أنها جزء من سكنية ؟
ج/ الكلام ده محصلش والفلوس دي فلوس بيع شقه زي مقولت في التحقيق .
ملحوظة : حيث رأينا الاكتفاء بالقدر الذي بلغته التحقيقات بجلسة اليوم على أن يستكمل استجوب المتهم بجلسة تحقيق صباح يوم الأحد الموافق ۲۰۲۱/۱۰/۳۱ تمت الملحوظة.
س/ أنت متهم بطلب وأخذ مبالغ مالية على سبيل الرشوة من/ صلاح محمد قاسم محمد بوساطة كلا من السيد عطية إبراهيم وحسام الدين عبدالله فودة مقابل استعمال نفوذك لدى مسئولي وزارة الصحة والسكان لإصدار تراخيص تشغيل مستشفى دار الصحة - المملوكة للأول - ووقف تنفيذ قرار الغلق الصادر لها ؟
ج/محصلش وانكر هذا الاتهام تماماً .
س/ كما أنك متهم بارتكاب جريمة غسل أموال تحصلت عليها من ارتكاب جريمة الرشوة محل الاتهام السابق ؟
ج/ محصلش والفلوس دي ال 400 الف جنيه وال۲۰۰ الف جنيه دول نتيجه اني بيعت شقه مدينة نصر لمحمد امين .
س/ هل لديك أقوال أخري ؟
ج/انا عايز اتعرض علي اي مستشفي علشان تضخم البروستاتا اللي عندي .
س / هل لديك مزيد من الاقوال ؟
ج / لاتمت أقواله.