شيرين توفيق تكتب : صباح الخير يا طيبة
صباح الخير ياطيبة هتاخدي اجازة مننا كام يوم نفوتك بعافية ونرجع لك وانتِ متعافية هنغيب شوية صغيرين عشان ترتاحي من دوشتنا وشوارعك ترتاح من رجلينا، وهنرجع تاني صوت ضحكنا يرُجك وما تشتكيش، ونلعب في الشوارع ونشغل مزيكا عالية وما تشتميش. اهو نديكي فُرصة جمالك يبان وتاخدي بالك من نفسك، بدل ما احنا ليل ونهار كاتمين على نَفَسِك. خلي بالك بقى من بيوت الحبايب وقولي للشمس تبعت لهم دفا زيادة، وقولي لها ترمي نورها ف كل حتة وتبعترُه احنا قاعدين اهو لا هنقول برد ولا حر، بس هي تيجي كل يوم تحمّر خدودك وتقوي عودِك وتبعِد عنِك كل شر.
وخُدي اما اقول لِك يا مصر... مالِك محلِوة وزايدة غلاوة كدا اليومين دول؟ كانوا بيقولوا انك ضعيفة ووشِك اصفر...
فشر ده انتِ دايماً زي القمر، زي العروسة الحلوة.... زي النور في النظر. ما تزعليش بقى اذا كنت شتمتك مرة كدا والا مرتين ما انتِ أُم وعارفة اننا بندعي على ولادنا ونِكره اللي يقول امين، وبعدين ما انتِ بصراحة طلّعتي عيننا كتير وسكتنا. على اي حال سلامتك وسلامتنا.. ما تنسيناش واحنا مقفولة علينا البيوت، لو حد سألك علينا قولي لهم شوية وراجعين، ما تخافوش على ولاد بهية، وان قالولك مالهم كفى الله الشر.. قولي لهم عيانين بيا.
