”نهي جلال“ تكتب : كل الحب لمدير الفرع
النهاردة الصبح كنت فى كذا مشوار من بينهم مشوار لبنك حكومي، البنك ناقل الاقعدة برة علشان كورونا وزحمة رهيبة برة قدام البنك، اخدت الرقم وروحت اتمشى فى المول اللى جنب البنك ودخلت بعد انتظار ساعتين، وانا واقفة عند الشباك بخلص الإجراءات المدير المسؤول بيكلم شخصاً ما وصوته عالى جدا بيقوله " مش أنا قولت لك لما تيجى متقفش فى طوابير أنا مبلغ الأمن انت تيجى عليا اخلص لك كل حاجة " أنا هنا اتصدمت من جرأته بيتكلم بثقة وبصوت عالي وبما أنى شخص لسانه عامله مشاكل روحت عليت صوتي وبقوله ماشاء الله هو الفساد بقى عينى عينك كدا!! طب وطى صوتك اهو يبقى فساد بصوت واطى مش عالي كدا ده أنا بقالى ساعتين منتظرة وفى ناس برة اتحرقت من الشمس وانت بمنتهى الاستهتار بتقوله متقفش طابور ولا تاخد رقم ، وفضل يرد وانا ارد المهم أن الناس اتخانقت معايا أنا !! علشان لما اقول الشعب ده ماشي على المثل مقدرش على الحمار اتشطر على البردعة يبقى عندى حق.. المهم فضلوا يقولولي يا مدام عايزين نخلص بقى هو انتى هتصلحى الكون ماتمشى الدور و طبعا أنا سبت خناقتي مع الراجل ومسكت فى خناق الناس.. خرج مدير الفرع ودخلني مكتبه وبقوله يعني ينفع كدا!! يرضيك الفساد ده!! هى البلد حالها هيتصلح امتى !! حرام عليكم الناس ..قالى يا استاذة ده رقمى لما تيجى انا ادخلك عالطول وهنا قلبى كان يوقف من الفرحة .. كل الحب لمدير الفرع
