حمو بيكا: الصوت الجميل ليس شرط الغناء .. ”الأداء هو المهم”
قال مغني المهرجانات الشعبية حمو بيكا، إنه لم يكن يتخيل أن يحكم عليه بالحبس لمدة عامين، لافتًا إلى أنه علم به من المواقع الإخبارية. وأضاف بيكا، خلال حواره مع الإعلامية ريهام سعيد مقدمة برنامج "صبايا الخير"، عبر شاشة "النهار": "لما اتصلت بالمحامي وقلت له إني أخدت حكم سنتين، قال لي مفيش الكلام ده، لأن كل اللي كنت بكلمه قال لي هيتحكم عليّ بغرامة ومفيهاش حبس".
وحول مقطع الفيديو سبب الأزمة، الذي هاجم فيه نقابة المهن الموسيقية، قال بيكا: "قعدت ألف كل المكاتب عشان آخد تصريح، رغم إني كنت قادر أعمل الحفلة من وراهم وخلاص، حاولت آخد تصريح وأشتغل قانوني".
وتابع، أنه عمل "نجار مسلح" قبل احترافه غناء المهرجانات الشعبية: "إحنا أصلًا اللي بنبي البيوت والعمارات، بنعمل الخشب وبعد كده الحديد وكل حاجة، وكنت متفائل خير وكنت دائمًا أقول لوالدتي بكرة تشوفيني أحسن الناس، وكان حلمي إني أبقى حاجة كويسة".
وأوضح، أن والده هو من نصحه باحتراف الغناء، لكنه رفض في بداية الأمر: "قالي عاوزك تعمل أغنية صغيرة، قلت له لأ، قال لي اعمل أغنية زي ما صحابك بيعملوا زي فيلو وتيتو وبندق وحمو الحلواني، فرحت عملت أغنية ونجحت".
وأردف: "الغناء مش شرط يبقى صوت جميل، لكن الموضوع يعتمد على الأداء، أديت كويس، والناس سمعت الأغنية، صوتي كان غريب على الناس ومكنوش عارفين مين اللي بيغني، ده غير إني عملت الأغنية ورحت الجيش وقضيت الخدمة أيام أحداث يناير 3 سنوات وكنت في الشارع عسكري".
