جريدة الديار
الجمعة 29 مارس 2024 07:52 صـ 19 رمضان 1445 هـ
بوابة الديار الإليكترونية | جريدة الديار
رئيس مجلس الإدارة أحمد عامررئيس التحريرسيد الضبع

صابرين عاشور تكتب : حبل المشنقة

معرفش ! بصحي كل يوم الصبح

ألف حبل المشنقه حوالين رقبتي!

واطفي النور وأزعق قوي للدنيا

اقولها ليه من عيني غيبتي؟؟!

وليه افتح صدري ليكي .. تضيقي فيه

تخنقي فيا ..

أنا مش مستعدة اكون ليكي عشانهم ضحيه

وبرجع أمد لك إيدي ترجعيها فاضيه..

وتروحي جري للي يغري ومعري فيكي

ومخليكي سلعه ومتمنك ..

منا مستعدة إني انكرك وانهش في توبك

زيهم ابقي واحدة مثلهم أشرب ف حنضل

أضرب ف مندل واعوجك واتعوج

ألبس فستان قصير لركبتي وافرد

في شعري واعري ضهري كل يوم

مع اي واحد!

وأقعد ازهق ودنكم بكلام كله طهر

مريم بقا وانتوا اليهود

حبه جنود كلاب ورايا

شايفني احسن منهم

يتحلل لهم سفك دمي ..

فاجري قوام علي جبل عالي

يعصمني قال من مكرهم!

وافضل ألعن ف امهم ..

سهله أرسم علي الورق

حبه فضيله ..

بس بخاف واجي ارسم

تطلع حصيرة تدفي رجلي

من اللف علي لقمتي!

تايهه وتوهاني ليا بخت

قسمتي ..

سهله اهي .. طيب ليه ؟؟!

شايفني طالع عيني تجيبي

وتحطي فوقي شقى؟!

ليه مانتيش ليا مصدقة

إني تعبت؟؟! وزهقت مني ومنكم

وليه قصادهم تديني برستيجي وهيبتي

وبيني وبينك تمسحي بكرامتي الأرض؟؟!

وليه لما اقوم اصلي الفرض

تسحبي السجادة من تحت مني ؟؟!

عايزاني عاصي/ ليه ..

ليه إيه؟؟!

شايفني عيل صغير تحدفي لعبه

تضحكي بيها عليه؟؟!

عملاني ضحكه ومهرجان وافيه ..

وتيجي ليا تعيطي وتضحكي فيهم؟؟

معميه ليه عنهم ومبحلقه ليا ؟؟!

مبحلقه فيا عينكي واسعه قصادي

أمسك ف حلم واحد تطمعي

تشديه من جوة ضلعي

امد للتراب إيدي ..

يصبح جبل ويقف علي قلبي ويراضيكي..

وأرجع اتوه واحن لك ..

معرفش ليه !

بسحب سحابك من السما واتغطي بيه

وأرجع اعيط من البرد ليه؟؟!

معرفش ليه!

مجنونه باين؟؟!

مبسوطه يعني!

طيب ليه لما شوفتيه جاي يبعني

موقفتيش قصاده ولا حتي ضده

انتي وعيونه السود فيا عمالين تشدو

قطعتو جلدي وهدمتي !

إتلفيت بخيش .

سابني ومشي وانتي واقفه تسقفي ..

سايب ف قلبي عيال عليه بيعيطو .

محتاجين ل أب !

مش لاقيه غير إني أدعي ..

إبعدهم عني يارب ..

تعرفي..

انا بنبسط وسط القصيدة.

وبمسح دموعي في الورق

يكتب أنين ..

أرميه وسط الزبالة

يطرح فيها ألف عين

تشوف وساخه طبعكم

وأرجع ألف حبل المشنقة

حوالين رقبتي ..