رأفت عبد العظيم يكتب: حوار مع صديقى الطيب

سألنى صديقى الطيب عدة أسئلة كعادته معى .. وكان سؤاله الأول :
__ أنت مرتاح فى حياتك ؟
__ أيوه
__ طب أنت سعيد ؟
__ لأ
__ إزاى ؟
__ ياصديقى الغالى الراحة شئ والسعادة شئ تانى مختلف تماماً ..
أعتدل صديقى فى جلسته وفكر لحظة ثم سألنى سؤال لم أتوقعه حين قال :
__ أنت متضايق أو حزين من محنة مرضك ؟
بكل صدق قلت :
__ أنا مش متضايق أو حزين من محنة المرض ولا ألم المرض لأنه بقى صاحبى ولا متضايق من الأعراض الجانبية للأدوية لأن ده أمر طبيعى أنا متضايق لأن جسمى مبقاش مستحمل أكتر من كده وأنا دايماً بقوله إختشى وأحمد ربنا ده حالك أحسن من غيرك وربنا يشفى كل مريض ..
ضحك صاحبى وهو يقول :
__ ليه ياعم قلبتها دراما .. طب قولى ليه بتقول على نفسك من المحاربين القدماء ؟ ..
قلت له :
__ ياأهبل المحاربين القدماء دول المتجوزين من ٢٥ سنة أو أكتر ..
__ طب بالمرة قولى إيه أغرب وأجمل دعاية سمعتها ؟
سرحت لبعيد وتذكرت وقلت :
__ وأنا طالب فى ثانوى كان فيه بياع على عربية كارو ينادى بأعلا صوت ويقول : ولا تين ولا عنب ياخيار يالوبيا .. وكانت الناس تضحك لكن أنا أعتبرته أحسن وألطف الأعلانات للترويج لسلعة بطريقة عفوية سهلة ..
نظر لى صاحبى وقال :
__ أخر سؤال ومهم عندي : هو الحظ قدر ومكتوب ولا هو قلة حيلة مننا ولا أحنا اللى خايبين بالفطرة ؟
إبتسمت وقلت : أهو ده السؤال اللى معرفش إجابته ..