لأول مرة بدار الوطن ... ”حشيش فاخر” بمعرض القاهرة الدولي للكتاب 2020
في حوار خاص أجرته جريدة الديار مع المهندس يوسف حشيش اشهر انفلونسر ع الفيسبوك ومؤلف كتاب حشيش فاخر.
في البداية من هو يوسف حشيش؟
انا يوسف حشيش ٢٧ سنة مهندس مدني، قررت من ٢٠١٦ اشتغل في التسويق لأني لقيت نفسي فيه بشكل اكبر وتخصصت في كتابة الإعلانات وافكار الحمالات التسويقية للشركات.
اول تجربة في الكتابة؟
مسلسل في رمضان ٢٠١٩ اسمه "تجربة ماتمت" كان قصتي وسيناريو وحوار.. المسلسل كان من انتاج شركة سبوت ٢٠٠٠ - صفوت غطاس.
نبذة عن كتاب "حشيش فاخر"؟
حشيش فاخر هو كتاب اجتماعي كوميدي ساخر وده اول كتاب ليا.. بعرض فيه اهم مرحلة في حياتنا وهى المرحلة العمرية من ١٨ سنة لأواخر العشرينات، او بمعنى اصح بداية من يوم التنسيق قبل الجامعة لحد ما قبل الجواز مروراً بكل المراحل اللي بتحدد شكل شخصيتنا ومستقبلنا وهو ده السن اللي انا بستهدفه، الكتاب فيه جزء من الواقع وجزء من وحي الخيال.
ليه "حشيش فاخر"؟
حشيش هو لقب عائلتي، وحشيش فاخر ده اول اسم استخدمته في اول ظهوري على السوشيال ميديا كان عبارة عن برنامج لايڤ بيقدم محتوى كوميدي ساخر.
مين اللي بتاخد رأيهم في الكتاب؟
قبل البداية في الكتابة باخد رأي اصحابي واهلي، لكن من اول بداية الكتابة انا متعود اني بشتغل لواحدي تماماً من غير ما اخد رأي حد عشان مشتتش نفسي، وبحب جداً اشوف ردود افعالهم بعد ما يشوفوا الشكل النهائي
طقوسك في الكتابة؟
الانعزال التام عن الناس وكل وسايل الاتصال بيا تكون مقفوله
بتحب تقرا لمين؟
احمد خالد توفيق -مصطفى محمود- جلال عامر - احمد مراد
هتشارك في معرض الكتاب ٢٠٢٠ في القاهرة؟
"حشيش فاخر" هو اول مشاركة ليا في معرض الكتاب، وده كان حلم ليا ان يكون ليا كتاب بإسمي في المعرض، وبتمنى اني اكون عند حسن ظن كل اللي هيقرأ الكتاب
هل ستشارك كل سنة في المعرض؟
ان شاء الله السنة دي هتكون البداية بس واتمنى اني اقدر اكون مشارك كل سنة.
حلمك الاكبر في الكتابة؟
كتابة رواية وتحقق نجاح وتتحول في يوم لفيلم سينما.
