حسام حداد: الأهلي لا يلعب باسم مصر في مونديال الأندية
قال الإعلامي حسام حداد، إن النادي الأهلي لا يلعب باسم مصر في بطولة كأس العالم للأندية، إذ أنه يمثل نفسه في المقام الأول ثم يُنسب إلى دولة مصر، موضحًا: "هل مطلوب من الزملكوية النهاردة يشجعوا الأهلي؟! لأ، مش مطلوب".
وأضاف حداد خلال تقديم حلقة اليوم من برنامج "صباح الخير يا مصر"، المذاع على القناة الأولى والفضائية المصرية: "متقنعنيش إن إسبانيا بعدما حصلت على كأس العالم قام مشعو ريال مدريد بتشجيع برشلونة في دوري أبطال أوروبا حفاظا على حالة التشجيع للمنتخب الإسباني".
وتابع الإعلامي: "مش مطلوب من الزملكوية النهاردة يشجعوا النادي الأهلي لو هم مش عاوزين، واللي عاوز يشجع الأهلي يشجع الأهلي، واللي عاوز يشجع يشجع، ولو كان الزمالك في نفس الموقف نفس الكلام برضه".
وأكد، أن الأهم هو عدم عودة المشاحنات طيلة الشهر الجاري استعدادا لمباراتي منتخب السنغال المؤهلتين إلى نهائيات كأس العالم التي تستضيفها قطر الصيف المقبل، مشددًا على أن منتخب مصر يستحق الوصول إلى البطولة الأكبر في العالم: "مينفعش جمهور يغلط في لاعيبة الفريق التاني، اللي مش عاوز يشجع الأهلي ميشجعش، بس متتريقش على لاعيبة الأهلي وجهازه الفني، ولو الأهلاوية كسبوا بلاش حفلة".
وأردف: "الأهلي مش المنتخب ولا بيلعب باسم مصر، ويهمنا كلنا نكون وراء النادي الأهلي لكن اللي مش عاوز هو حر، لكن لازم نحافظ على الروح اللطيفة بين لاعبي الفرق المصرية".
