راؤول عن أزمة تامر حسني وحمادة هلال: ”هل ينفع تعجبني عربية وماشتريهاش”
نشر الشاعر الغنائي أحمد حسن راؤول عبر صفحته الشخصية علي موقع التواصل الاجتماعي "فيسبوك" رأيه في الأزمة التي حدثت بين الفنان تامر حسني والفنان حمادة هلال بعد تصريحات الأخير عن أغنية "عيش بشوفك" التي غناها تامر حسني بدلا منه.
وقال راؤول خلال المنشور: "بمناسبة موضوع حمادة هلال وتامر حسني والاتنين ليهم كل الاحترام والمحبة بس دي مشكلة بتقابل كل الصناع وأنا الحمد لله تداركتها من بدري وبقا المطرب اللي ما يخلصش في الغنوة فهي ممكن في لحظة تروح منه مهما كان اسمه مش بستنى حد لإن مع الخبرة عرفت إن محدش هيستناني".
وتابع راؤول متسائلا: "هل ينفع أروح معرض عربيات مثلا وألاقي عربية عجباني وأركبها كده وألاقيها حلوة أوي وأقول له دي عجباني أوي وهشتريها إن شاء الله وأسيبه وأروّح؟ طب سيبته وروّحت هل هو مطالب ما يبعش العربية دي لحد غيري؟ حد جه وعجبته وكان ملتزم وخلّص فيها وهو واقف او حتى ساب عربون واحترم وقفة الراجل وتعبه؟".
كما استطرد قائلا: "مشكلة بعض المطربين بعيدا عن حمادة هلال خالص والله إنه فاكر إن نجوميته تشفعله يعمل اللي هو عايزه ده مش صح، الأغنية هي البطل، والأغاني الحلوة بقت قليلة، وبقينا إحنا الصناع اللي بنختار المطرب اللي ينجّح أغنيتنا وتعبنا ويحترم مجهودنا الزمن إتغير".
وتابع قائلا: "في مطربين كتير من الأذكياء فنياً بيلقطوا الفلتات ودول ربنا رزقني بالشغل معاهم عصر إنك تعجبك غنوة وماتقدّرش صناعها انتهى، وده الفرق بين النجم الكبير وغيره".
وأنهي راؤول كلامه موضحا: "ووالله ما أقصد حمادة هلال نهائي لإني ماتعاملتش معاه ومقدرش أحكم عليه أنا بتكلم عن مشكلة عامة وشكرا".
يذكر أن المؤلف الغنائي أحمد حسن راؤول قد صرح من قبل أن الفنان تامر حسني قد انتهى من تسجيل أغنية من كلماته وألحان إسلام زكي، وتوزيع إلهامي دهيمة، وأحمد حسام.
