شريف إدريس يعلن إعتزاله الفن وتغيير مسار حياته

نشر الفنان الشاب شريف إدريس عبر صفحته الشخصية على موقع التواصل الاجتماعي فيسبوك، قرار اعتزاله الفن وطلب من خلال منشوره فرصة عمل أو سفر.

وقال إدريس خلال المنشور: بسم الله الرحمن الرحيم بعد ٣٥ سنة سعي وتعب وشقى في الوسط الفن،ي قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد وده قرار أخدته بعد ما الامور وصلت في الوسط الفني لمرحله عبثيه وصلت اني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم علي ناس معينه.

وتابع شريف قائلا: فلو الامور وصلت لكده ابعد احسن وحتي لما بيجي شغل بيتفرض عليك توافق باقل الفلوس وتخرج من الشغل مديون، ومواقف مهينه زي ان شركة انتاج تعرض عليك اجر هو قيمة ربع اجرك والسبب انهم الميزانيه مصروفه عالديكور، طب خلو الديكور يمثل.

وحكى شريف موقف حدث معه: هحكيلكم موقف حصل معايا من أسبوع، اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور، كان هيجيلي جلطة بعد ما قفلت المكالمة ووافقت علشان أنا محتاج اشتغل ومحتاج فلوس، وما قدرتش استوعب الفكرة بصراحة إني بعد العمر ده مضطر ادفع علشان اشتغل فاتصلت واعتذرت، وده الحال حاليا ان الامور بقت في ايد كاستينج دايريكتور، وده موقف من مواقف كتير مريت بيها لو حكيتها محتاجه كتاب مش بوست عالفيس.

كما تابع قائلا: فطالما الشغل بقي لازم يتدفعله، وطالما الشغل بقي بالشحاته، يبقي بلاش أحسن أنا طول عمري راضي الحمد لله، بس حقيقي انا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات اطفال بعبدهم عباده متخيلين حجم المسؤلية، وبقيت مديون لطوب الارض.

وأوضح: حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما أموت لأن حقيقي انا مش قادر أعيش في البلد دي تاني انا حاولت أسعى في أي مجال تاني بس ماقدرتش.

واستطرد قائلاً: وحقيقي لو أتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شيء.

وأوضح: همسح ابلكيشن فيسبوك من تليفوني لأني هنزل ابيع تليفوني أصلا، فانا هاكون متاح أونلاين لحد بالليل.. لو حد عنده فرصة شغل وسفر ليا ومش معاه رقمي يا ريت يجيبه من أي حد.

ملحوظة: أنا مش محتاج طبطبه من حد أنا محتاج فرصة سفر وشغل تخليني أعيش ولادي حياة كريمة وبس.

وأنهى شريف إدريس منشوره: شكرا ليكم محبتي للجميع، هاين عليا أقوم ارمي نفسي من البلكونة بعد ما وصلت اني اكتب البوست ده.