رحمة حسن تروي تعرضها لـ ”عضة كلب”
روت الفنانة الشابة رحمة حسن تعرضها لعضه لكلب أثناء مرورها في الشارع بجوار منزلها وذلك عبر صفحتها الرسمية على موقع التواصل الاجتماعي انستجرام.
وقالت رحمة راوية مع حدث: مساء الخير امبارح الساعة 11 بليل كنت نازله أجيب حاجة من السوبر ماركت جنب البيت وكنت ماشيه على الرصيف وكان في عربية بتركن جانبي عادي، فجأة الباب أتفتح ولقيت كلب جيرمن شيبرد تقريبا مش متأكدة أوي بيهجم عليه بكل قوته، طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم واجري وصاحبته حاولت تشده بس فك الليش بتاعه وعضني عضة كبيرة وغويطه بنابه في منطقة حساسة.
وتابعت: صاحبة الكلب كتر خيرها أخدتني بسرعة على مستشفى إمبابة أدوني حقنة تطعيم الكلب ولسه فاضلي 4 هاخدهم خلال شهر بس المشكلة أن من امبارح الجرح بينزف دم كتير وانا طبعا خايفة ومصدومة وتعبانة وعندي تورو من امبارح واللي واجعني اكتر أني مش عارفه أتصرف أزاي خصوصاً اني أكيد مش عايزة الكلب يتأذي بس كمان مش عايزة أي إنسان كمان يتأذي ويتعض ويتبهدل في الشارع زيي.
وأضافت رحمة: أنا كنت بشوف الكلب ده دايما مع صحبته بتمشي بيه في الشارع جنب البيت عندي وعلشان شكله شرس كنت بمشي بعيد عنه لما يشوفه امبارح صاحبة الكلب قالتلي متخافيش هو عض ولادي قبل كده وتمام محصلش حاجة طبعا أنا اتصدمت لما عرفت أن الكلب مش أول مرة يعض حد ومع ذلك هي سيباه عادي في الشارع من غير كمامة أو حد قوي يمسكه.
واستنكرت: بجد حرام عليكم الكلب لما بيكون كبير وشرس بيعتبر سلاح، وصاحبه مسؤول مسؤولية كاملة عنه ويحاسب على إهمال مسؤوليته، خصوصا لو إهماله تسبب لشخص تاني في اذاي بدني يحتاج أكثر من 21 يوم علاج واذي نفسي معرفش هيحتاج قد ايه علشان يخف.
وأنهت رحمة روايتها: أنا كنت بحب انزل أحط اكل ومياه للكلاب والقطط تحت البيت دلوقتي أنا حقيقي مرعوبة وخائفة جدا أنا اسفه طولت عليكم لكن أنا مش عارفه المفروض اعمل إيه علشان محدش تاني يتأذي.
