ننشر التحقيقات مع سعد الصغير في قضية حيازة وتعاطي المخدرات

حصل "الديار "على نص التحقيقات مع المطرب الشعبي سعد الصغير، في اتهامه بحيازة سجائر إلكترونية تحتوي على المخدرات من جوهري الحشيش والمخدر، في أثناء عودته من أمريكا مرورًا بالدوحة متوجهًا إلى مصر، وبتفتيش حقائبه عُثر على 9 سجائر من فئة الفيب تحتوي على المخدرات.

اللي حصل إن أنا من حوالي 4 أيام سافرت أمريكا كنت رايح أشتغل وأعمل حفلتين للي منظمهم، وهو اللي طلبني في أمريكا ونظملي الحفلتين وبعد ما خلصت أداني هدية مجموعة من الفيب - سجائر إلكترونية - وقال فرقهم على الفرقة بتاعتك عشان هو عارف إني مش بشرب سجاير، وأنا كنت عارف إنها سجائر عادية فأخدتهم وركبت الطائرة من أمريكا وكنت راجع على مصر وفيه ترانزيت في الدوحة في قطر، وكنت معايا شنطة واحدة فيها لبسي منهم بدلتين، وفيهم الكيس الأسود اللي جواه سجاير الفيب - السجائر الإلكترونية- اللي إدهالي، ووصلت مطار القاهرة قبل الفجر.

اعترافات سعد الصغير
وأضاف سعد الصغير في اعترافاته أمام جهات التحقيق: لقيت فرد جمرك بيسألني معاك حاجة قلت له مش معايا غير شوية سجائر فيب، وقالي هات الشنطة الفيب دي هتتجمرك وخد الشنطة وفتحها ولقى في الكيس حوالي 19 جهاز سيجارة فيب، وقالي إن في 9 منهم ريحيتهم مش حلوة، قلت له يعني إيه قالي يعني كويسين؟ قلت له طب اتأكد عشان كلهم زي بعض، وقالي لا هم الـ 9 دول مش كويسين، وعمل حضر ورجعلي باقي السجائر الفيب والشنطة وخد الـ 9 اللي بيقول عليهم، وده كل اللي حصل.

وشرع رجال التحقيق في سؤال سعد الصغير عن كيفية حصوله على السجائر الإلكترونية المخدرة، وكيفية ضبطه بمطار القاهرة، وتفاصيل رحلته إلى أمريكا والعودة منها، وجاءت كالآتي:

س: متي وأين حدث ذلك؟
ج: الكلام ده حصل قبل الفجر النهاردة 10 - 9 - 2024 حوالي الساعة 1:30 صباحًا في مطار القاهرة صالة رقم 3 وصول دولي.

س: وما سبب ومناسبة وجودك بالمكان والزمان بالبيان؟
ج: أنا كنت راجع من السفر من أمريكا

س: وما تفصيلات الرحلة التي حضرت على متنها البلاد؟

ج: هي رحلة الطيران القطري، مش فاكر رقمها، بس أنا ركبت من أمريكا أول أمبارح 8/9/2024 وكان فيه ترانزيت في الدوحة، وصلت امبارح 11 مساء في الدوحة، وقعدت هناك كام ساعة وجيت على مصر.

س: وما الغرض من تلك الرحلة لدولة الولايات المتحدة الأمريكية؟
ج: أنا كنت في ولاية تيكساس كان عندي حفلتين وخلصتهم ورجعت.

س: وما مدة إقامتك بتلك الدولة؟
ج: أربعة أيام بس ورجعت.

س: وما طبيعة وصف الحقائب حيازتك؟
ج: أنا كان معايا شنطة سفر صغيرة لونها روز كنت بجرها وبمشي بيها على الطائرة.

س: وما محتوى تلك الحقيبة؟
ج: كان فيها لبسي وكان فيها كيس بلاستيك أسمر في سجائر الفيب -سجائر إلكترونية- اللي منظم الحفلة ادهالي هدية.

س: صف لنا تلك السجائر الإلكترونية حيازتك؟
ج: هي عبارة عن حوالي 19 جهاز فيب بنكهات تفاح وعنب وحاجات تانية.

س: ومن أين تحصلت على تلك السجائر الإلكترونية؟
ج: من واحد اسمه راغب، وهو منظم الحفلتين اللي كانوا في أمريكا، وهو أمريكي من أصل مصري وعايش في أمريكا.

وأمرت النيابة العامة بإحالة المتهم سعد الصغير محبوسًا إلى محكمة الجنايات المختصة؛ لمعاقبته على ما أُسند إليه من ارتكابه جناية إحراز جوهَرَي الحشيش والترامادول المخدريْن؛ بقصد التعاطي في غير الأحوال المصرح بها قانونًا.