بسمة وهبة تحتفل بعيد الحب بهذه الطريقة

أهدت الإعلامية بسمة وهبة، باقة من الورد لمتابعي برنامجها 90 دقيقة الذي يعرض على قناة "المحور"، بمناسبة عيد الحب.

وقالت: "أهدي هذا البوكيه لكل من يتابعنا ولبلدنا الغالية مصر اللي شايلانا في نن عينيها ومش مقصرة معانا".

وأضافت وهبة خلال حلقة اليوم الإثنين: "هل لسه الناس بتحب بجد؟ ولا خلاص بقينا غرقانين في زمن المادة والمصالح .. النهاردة كنت مبسوطة بمعايدة الناس على بعض".

وتابعت: "وأنا جاية النهاردة بنتي قالت لي عاوزة أجيب هدايا لأصحابي لأني عاوزة أعبر عن حبي ليهم، وقلت لها خدي لكل واحدة وردة، لكن بصة واحدة على السوشيال ميديا الملعونة بترجعنا للواقع تاني وتقولنا حب إيه اللي انت جاية بتقول عليه".

وأردفت: "هتلاقي ناس بتتريأ على الورد والدباديب ووفكرة عيد الحب، انت مالك؟! سيب الناس تعبر عن محبتها بالطريقة اللي تعجبهم، وهتلاقي جروبات ستات مليانة سم، وبيسألوا بعض جابوا ايه وبكم؟ دهب ولا ألماظ؟ خليه ياخدك يعشيكي في مطعم .. كأن المادة هي كل شيء".

بسمة وهبة عن سخرية السوشيال ميديا من احتفالات عيد الحب: شفت احتقار مخيف

أعربت الإعلامية بسمة وهبة عن حزنها الشديد بسبب سخرية بعض رواد منصات التواصل الاجتماعي من احتفالات عيد الحب، موضحةً: "شفت احتقار مخيف على منصات التواصل الاجتماعي مخيف للحب"، مضيفة "احنا متربيناش على كده ولا احنا المفروض نبقى كده، وهو ما يفسر نسب الخناقات والطلاق والعنف العائلي وتقييم العلاقات بين البشر على أساس المصلحة".

واستكملت بسمة وهبة: "اوعوا تتخيلوا اننا بنتكلم عن الحب العاطفي فقط؟ أتحدث أيضا عن البلد والمجتمع والأرض .. للأسف في ناس بتحب بلدها بشروط، إما تستفاد وتكسب وتلم فلوس أو البلد تبقى وحشة بالنسبة لهم وهو ما حدث من رجال أعمال كثر حققوا أرباحا طائلة بفضل مصر وعندما احتاجتهم لم يدعموها".

برنامج 90 دقيقة

برنامج 90 دقيقة يتعرض على قناة المحور من السبت الي الإربعاء فى تمام الساعة 8 مساء، من تقديم الإعلامية بسمة وهبة، يتناول البرنامج جميع القضايا سياسية واقتصاد وفن .