شقيق ياسمين عبد العزيز يوجه هذه الرسالة لها

قال وائل عبد العزيز شقيق الفنانة ياسمين عبد العزيز: "لو ياسمين محتاجاني أنا موجود ومش هفرض نفسي عليها، وأنا طول عمري خط الدفاع الأول عنها، لإن والدي كان منفصل عننا".

ولفت خلال لقائه ببرنامج “كلام الناس” المذاع على قناة “إم بي سي مصر”: "اتهددت بالقتل واترفع عليا مسدس من أحد المنتجين بسبب خلاف بينه وبين ياسمين عبد العزيز لإنها مكنتش اخدت حقها كامل في حملة إعلانية عملتها له".

وأكد: "مساندتي لياسمين عبد العزيز هتكون حسب رغبتها ولو مش عايزني أكون معاها أهلا وسهلا ولو مش عايزاني خلاص براحتها".

وتابع: "أحمد العوضي أعرفه من فترة وابتديت اتابعه من مسلسل كلابش 2 وباركت له على دوره، واتقابلنا في فرح أخت أحمد خالد موسى ولكن انا معنديش مشاكل، بس دلوقتي بقينا أصحاب مقربين بعد زواجه من أختي".

وأشار: "أحمد العوضي محاولش يتدخل في أزمتي مع ياسمين عبد العزيز لأن الخلاف أسري، ولكن أنا معنديش مشاكل معاه ودلوقتي بقينا أصحاب".

ولفت: "اشتغلت مع أحمد العوضي في مسلسل "لآخر نفس" وتنبأت له بالبطولة المطلقة".

وقال: "السوشيال ميديا بالنسبة لي أداة تعبيرية، والتجربة علمتني إني أراجع نفسي وأقرب من ربنا أخدت قرار إني هلتزم في الصلاة ومنشغلش بالسوشيال ميديا"، مضيفا: "بقيت أبعت البوستات لنفسي وأفكر فيها قبل ما أنشرها".

وتابع: "نشرت صورة والدي مع الفنان حسن يوسف تقديرا لحقه وهو كان من أبطال حرب أكتوبر 1973، وكان عنده موهبة التمثيل لكن فرصته مجتش".

ولفت: "الفنان أحمد حلمي قال لي كله بوقته ونصيبي هيجي في وقته، وأنا اتعلمت كتير من الدروس والتجارب اللي مريت بيها".

وأشار: "الدرس اللي تعلمته أنه في حاجات مينفعش تتقال على السوشيال ميديا، والخوف علي حد ممكن يضره زي الدبة اللي قتلت صاحبها أو القطة اللي أكلت ولادها".

وأكد: "أعترف إني غلطان في أزمة ياسمين عبد العزيز بنسبة 100%، بس انا لو غلطت محدش ينفع هي تحكم عليا بالإعدام، والاعتذار من شيم الرجال، وفي الاَخر هي تجارب وعدت واتعلمت من هنا، والفترة الجاية أنا مش فاضي غير لشغلي".

وتابع: "غلطت في اختيار بعض الألفاظ وأنا بوصف علاقتي بياسمين عبد العزيز، شريف اخويا طرف حيادي في أزمتي مع ياسمين، وباخد رأي والدي مؤخرًا في أزمتي مع ياسمين ودايما بيقول اهدأ".