نهى العمروسي تكشف كواليس سجنها وحقيقة تعاطيها المخدرات
قالت الفنانة نهى العمروسي: "جبت لنفسي مصايب سودة حتى السجن، كنت بهزر قبل ما اتسجن بشهر واحد مع واحدة صاحبتي في مكالمة وبقولها عنوان المانشيت اللي نزل عني بالظبط، القبض على نهى العمروسي مع مجموعة شباب، ووقتها كنت بهزر معاها".
وتابعت خلال لقائها ببرنامج "كلام الناس" المذاع على قناة "إم بي سي مصر": "الموقف اللي خلاني أتكلم مع صاحبتي وأهزر معاها الهزار اللي قلب بجد، إني كنت عند ناس صحابي واتخانقوا فجريت عند باب العمارة فلقيته مقفول فحسيت إن البوليس ممكن يجي يقبض علينا، فاتصلت بصاحبتي ولاء وقلت لها المانشيت اللي اتنشر بعدها بشهر، القبض على نهى العمروسي مع مجموعة شباب، والموضوع كان هزار ليس إلا ولكنه تحقق بقوة الكلمة والطاقة السلبية".
ولفتت: "من ضمن الطاقة السلبية إني كنت بتكلم مع المخرجة كاملة أبو ذكري بخصوص دوري في مسلسل سجن النسا، وأنا بتناقش معاها ومش عاجبني دوري فقلت لها وأنا بقرأ السيناريو عجباني أوي حياة السجن، وقوة الكلمة السلبية تحقق ما قلته وكأنها مثل التعويذة"
وأشارت: "تجربة السجن مهمة جدًّا في حياتي واستفدت منها، وكان لي قصة مع سجينة محكوم عليها بالإعدام اكتشفت بأنها مفسرة أحلام، ولما حلمت إني على بحيرة وشعري قصير، وقتها عرفت بالحلم فبعتوا صحوني من العنبر بتاعي وقالوا لي هنية عايزاكِ فروحت لها عنبر الإعدام لقيت واحدة قمر رغم إنها قتلت زوجها وحكت لها الحلم وفسرت لي تفسير دقيق تحقق، وكنت متعاطفة معاها جدًّا".
وأكدت: "اتظلمت في قضية سجني وأثيرت شائعات كتير ضدي ولكنها مش صحيحة، وطلبت من الطب الشرعي خضوعي لتحليل المخدرات وقتها وأثبت إني مش بتعاطي مخدرات ولا حتى بشرب سجاير وأنا مش في موقف الدفاع عن النفس لأني أخدت براءة".
وأوضحت: "شكل عيني اتأثر بسبب مرض في الغدة الدرقية وهو نفس المرض اللي أصاب أم كلثوم".
