اعترافات طليقة قاتل حسني الخناجري جواهرجي بولاق أبو العلا

كشفت التحقيقات تفاصيل جديدة في أقوال المتهمين في واقعة مقتل حسني الخناجري جواهرجي بولاق أبو العلا، وسرقة مشغولات ذهبية تمثلت في 5 غوايش، و6 سبائك ذهبية، و7 جنيهات ذهب، و4 خواتم، و4 سلسة، و3 انسيالات، ومبلغ مالي.


ويواصل" الديار" نشر اعترافات المتهمين بارتكاب واقعة إنهاء حياة جوهرجي بولاق أبو العلا، وجاءت أقوال أحد المتهمين في القضية وهي طليقة المتهم الأول، حول سؤالها بشأن الواقعة كالتالي:

س: ما ظروف تواصلك مع المتهم يوم الموافق 27/2/2024؟
أجابت: سلمى الصبح لقيتها بتقولي بابا حولي فلوس وبالفعل جيت أشوف على موبايلي لقيت اتحولي من محمد 400 جنيه بس من رقم غريب، بس هما من محمد يعني ونزلت سلمى حوالي الساعة 12 مساءً، وراحت قابلته ولما قولتلها هتقابليه فين قالتلي هو قالي اركبي التاكسي وأنا هقوله يوديكي فين، وبعديها كلمت سلمى لقيت تليفونها مقفول وكلمته هو كمان لقيت تليفونه مقفول.

وأردفت: والكلام ده كان حوالي الساعة 3 مساءً فنزلت اشتريت شوية حاجات وحوالي الساعة 4 وشوية كلمني تاني ورد عليا فقولتله هي سلمى قافلة موبايلها ليه؟ وانت قافل موبايلك ليه؟ قالي انا كنت بصلح الموبايل، فأنا قولتله أنا جاية آخد سلمى وخليها تستناني عند العبد، راح قالي العبد ده بعيد عن المكتب بتاعي بس ماشي هجيبهالك، وبالفعل روحت.

وأكملت: وأول ما شوفتها سلمى قالتلي بصي بابا جابلي إيه، وكانت بتشاور على الدهب اللي كانت لابساه، ووريتني غويشتين هي لابساهم وسلسلة وحلق وحلقين لمكة ومليكة، فراح ساعتها قالي شوفي الخايبة أنا كنت مديها سلسلة تقيلة بس هي ما رضيتش بيها وخدت الخفيفة أنا مش
مديهالها تتأنعر بيها أنا مديهالها عشان تشيلها لجهازها، وبعدين روحنا في مطعم كباب وكلنا، واحنا قاعدين بناكل قال لسلمى قومي قلعيني السلسلة دي وفعلًا سلمى قلعتهاله وراح قالي خدى دي هدية عيد ميلادك، عشان انتي صرفتِ على العيال الفترة اللي فاتت دي، ودول عيالي ومسئولين مني، وقولتله اديها لسلمى فقالي لا خديها فروحت خدتها منه وبعد كدة قمنا من المطعم ومشينا.

وأضافت: وكان جايب لسلمى عروسة كبيرة وجايب عروستين لمكة ولمليكة وقالي ساعتها أنا جايب ست غوايش لمكة ومليكة 3 لـ دي و3 لـ دي، فقولتله طيب ما تجيبهم قالي أنا مستني أعمل مصلحة، وبعد كدة هديهملك ولما سألته انت جايب الحاجات دي منين قالي أنا خدت نصيبي ده من الشغل فبقوله شغل إيه قالي دانا بشتغل دلوقتي كل يوم في فندق شكل وبسافر أسوان عشان أجيب شغل، وبعد كدة طلب مني آجي المكتب معاه فأنا رفضت في الأول قالي ماتخافيش البنت معانا مش هعملك حاجة وطلعنا المكتب معاه وادى لسلمى سلسلة ووراني كل الدهب اللي كان معاه، وبعدين ساعتها خدت سبيكة 2.5 جرام وبعد كدة نزلنا وهو اداني 200 جنيه روحت مدياها لسلمى، وقالي يعني انتي كدة مش هتركبي على حسابي وروحنا مشينا.