علاء ولي الدين يكشف رأيه في المرأة.. وقصة أول حب في حياته

علاء ولي الدين فنان كوميدي راحل تميز بخفة الدم في الافلام القليلة التي عمل بها قبل وفاته وفي الحقيقة وظهر ذلك خلال استضافته في البرامج التلفزيونية،وفي حوار تلفزيوني قديم مع الاعلامية هالة سرحان،كشف علاء جوانب مش شخصيته وكشف عن قصة حبه الوحيد التي انتهت بعذاب شديد له.

في بداية الحوار سالته المذيعة :أمتى بتضحك من قلبك ؟
رد عليها علاء ولي الدين قائلا:لما محمد هنيدي بيتخنق ، لما تحصل حاجة تنرفزه ويبقى مخنوق بضحك جامد جدا ، بيتعصب وبيبقى عامل زي الطفل الصغير اللي خدتي منه كورة ، بيبقى لذيذ جدا.

وعن الموقف او الخبر الذي جعله يبكي من قلبه وتألم بسببه كثيرا ،قال علاء: لما والدي توفى، كنت مرتبط به جدا وبحبة بدرجة كبيرة ولما توفي حزنت بشدة وفراقه اثر عليا كتير،ودخولي للفن كان تنفيذا لوصيته ليا قبل وفاته ،قالي تكمل في الفن بس بعد ما تاخد شهادتك،وفعلا اخدت بكالوريوس التجارة،وقدمت في معهد الفنون المسرحية.

سالته المذيعة : ايه كمان يعني حدث لما سمعته هزك بشدة ؟
اجاب علاء: ممكن لو طفل لقيته بيعيط جامد جدا يضايقني يخليني أعيط لو معرفتش أعمله حاجة ، طفل مظلوم كده بيعيط او واقف تايه ده يعيطني 

سالته المذيعة ولو واحدة بتحبك وبتعيط ؟
اجاب علاء: ده انا أقع في الأرض 

وعن رأيه في المرأة المثالية في نظرك او المرأة الحلم،قال علاء ولي الدين: لمرأة الحلم هي المرأة الذكية أولا ، اللي تحترم نفسها وتحب نفسها لانها لو حبت نفسها هتبقى كويسة وهتعرف تحب كويس ومش هتهين نفسها ، يعني لازم تكون حابة نفسها أكتر عشان كمان تعرف تدي الحب.

مواصفات المراة الجميلة عند علاء ولي الدين

وعن  المواصفات الشكلية للمرأة التي تجذب علاء ولي الدين وقال: روحها تبقى كويسة مش لازم تبقى جامدة اوي وملكة جمال ، يعني أهم حاجة الروح ، طالما الروح حلوة وفيه نص جمال ده يساوي امرأة جميلة جدا.

قصة اول حب في حياة علاء ولي الدين

حكي علاء ولي الدين في حواره مع الاعلامية هالة سرحان قصة اول حب في حياته وقال: اول ما اشتغلت زمان في أوتيل كان فيه واحدة زميلة معايا في الأوتيل بشوفها كل يوم وكان عندي 18 سنة ، فكنت كل يوم بشوفها ونقضي الفترة اللي هي من 9 ل4 وأوصلها بعد كده فحصل تعود وحبيتها من طرف واحد وبقيت خجلان ان انا أقولها اني بحبها فقلت هي هتحس وأفلام عربي وكده وفضلنا ع الموال ده كتير جدا وبعدين لقيتها طلبت نمرة تليفوني فقلت بس ده فيه تليفونات جامدة هتحصل ، كانت بتكلمني تسألني على حاجات في الشغل وانا فاهم انها مهتمة بيا.

وبعدين في الاخر خالص بقى لقيتها في يوم بعد حوالي 6 او 7 شهور قالتلي "انت وراك ايه يوم الخميس ؟ انا واخدة اجازة" ، قلتلها "أخد اجازة انا كمان بس فيه ايه ؟" .. قالتلي "ان شاء الله خطوبتي يوم الخميس".. فكانت مشكلة كبيرة بالنسبة لي وقعدت اتعذبت بسببها فترة.