لميس الحديدي تسأل عن «الشبح الخفي» في المنتخب

علق الناقد الرياضي حسن المستكاوي على تصريحات المدير الفني لمنتخب مصر كارلوس كيروش، اليوم، قائلًا: "كارلوس كيروش ليس انهزاميًا، وأنا معترض إن يكون حلمنا هو الوصول لكأس العالم والاتحاد اتعاقد معاه عشان كده".

وتابع في مداخلة هاتفية ببرنامج "كلمة أخيرة" الذي تقدمه الاعلامية لميس الحديدي على شاشة "ON" قائلًا: "كيروش عنده حق لما قال إن مفيش مدرب قبل بطولة يقول هاخدها وهكسبها.. الكورة فيها نتايج غريبة ومتغيرة، ولو قال هاخد البطولة الناس هتهاجمه أكتر".

وتابع: "تصريحات كيروش ليست فيها عدم اهتمام ببطولة كأس الأمم.. وهو مهتم جدًا بالبطولة زي ما كان مهتم قبل كده".

وعلقت الحديدي قائلة: "المدير الفني للمنتخب منه لربنا ومحدش بيكلمه! وفينجادا الشبح الخفي اللي بياخد 60 ألف دولار في الشهر بيعمل إيه؟"، ليرد المستكاوي قائلًا: "اللي تعاقد مع كيروش أكيد قعد معاه وحدد الهدف، ومفيش حد بيحاسب حد.. ووالله لو فينجادا بيعمل حاجة محدش هيتكلم".

واستطرد: "إحنا بقالنا 10 سنين مش بنلعب كورة كويسة، ولو بنعلب كورة كويسة الجمهور مش هيزعل لو خسرنا بطولات ومباريات".

وواصل: "شيء خطير جدا لما يتم تأجيل مباراة والمدير الفني للمنتخب ميكونش عارف كده، وجميع الاتحادات المصرية اللي تولت اتحاد الكرة مكانش عندها مشروع، والاتحاد الجديد لازم يعمل مشروع".

وأتم: "بنروح كأس العالم ومبنلعبش كورة لأن مفيش مشروع كروي لدى اتحاد الكرة".