جريدة الديار
الجمعة 29 مارس 2024 01:00 مـ 19 رمضان 1445 هـ
بوابة الديار الإليكترونية | جريدة الديار
رئيس مجلس الإدارة أحمد عامررئيس التحريرسيد الضبع

ريهام سعيد: حسبى الله ونعم الوكيل في هؤلاء

ريهام سعيد
ريهام سعيد

وجهت الإعلامية ريهام سعيد، رسالة لمجموعة من الشخصيات قالت إنهم ظلموها، وتسببوا في سجنها وإنهاء مسيرتها الإعلامية بهذا الشكل، وسرقة نجاحها عبر الاستيلاء على صفحة برنامجها الشهير "صبايا الخير"، ومواجهتها حتى في مجال التمثيل.

وكتبت ريهام سعيد، في منشور عبر حسابها بموقع تبادل الصور والفيديوهات "إنستجرام": "حسبي الله ونعم والوكيل في كل مفتري وفي كل أفاق ساهم إنه يقضي علي مجهود سنين طويلة. حسبي الله ونعم الوكيل في كل واحد ساهم إنه يصدر فكرة غلط عني وعن شخصيتي. حسبي الله ونعم الوكيل في كل واحد جاب سيرتي عشان يشدني لمشكلة واطلع في الآخر بتاعت مشاكل لما يكون ليه رد فعل".

وأضافت: "حسبي الله ونعم الوكيل في كل واحد وقفت جنبه واتخلي عني في وقت شدة وعارفاهم بالاسم ومش هانسي. حسبي الله ونعم الوكيل في كل واحد مايعرفنيش وقال كلمة وحشة عني. حسبي الله ونعم الوكيل في كل صحفي كتب خبر في عز أزمتي عشان يقضي علي شغلي واسمي أنا ٢٢ سنة مقراتش كلمه كويسة مع اني حققت نجاحًا غير مسبوق".

وتابعت الإعلامية ريهام سعيد: "حسبي الله ونعم الًوكيل في كل واحد كتب بوست شتيمة عن جهل لما سمع وماشافش المهم إن كل دول فاهمين إنهم انتصروا غلطانين أنا صحيح اعتزلت لكن أنتو كل يوم يتعرفوني أد إيه أنا ناجحة ومهمة وشاطرة. عرفتوني قيمه الحياة الحقيقية وهي العيلة والاولاد وطاعة الله لكن أوعوا تستهونوا بحسبي الله ونعم الوكيل والله الحق راجع".

واستطردت: "أما بقي اللى رماني في السجن ظلم ده حسابه عند ربنا عسير أنا سبت ابني عنده شهر من غير رضاعة من غير ما أعمل أي حاجة. أنا عملت كتير بس مكنتش مستنية شكرا بس مكنتش مستنية برضو افتري واذي كده. كتبت الكلام ده لأني تعبت من الافترى اللى في كل حتة والمصلحنجية فص ملح وداب والناس اللى كسبت من ورايا ملايين ورموني في الآخر وخربوا بيتي وسرقوا صفحتي اللى عليها ١٥ مليون".

وواصلت ريهام سعيد: "لكل اللى افتري عليه يا رب تصحي من النوم تلاقي الصراصير ماشيه علي وشك زي ما تكون في قبرك وتفضل محبوس ايام مش عارف النهار من الليل في مكان ….ان شاء الله يحصل للك زي ما حصل لي عشان تعرف اني اقوي من اي حد وباذن الله ربنا يعرفك انك ظالم في جهنم ان شاء الله. عارفه ان معنديش ضهر ولا علاقات ولا نفوذ ولا حد واقف جنبي مع اني وقفت جنب ناس كتير لكن ليه رب اسمه الكريم العادل".

واختتمت ريهام سعيد: "أنا ولا أخدت صور من علي موبايل ولا شتمت تخان ولا خطفت حد ولا خليت التعلب يعيط أنا كنت في منتهي المهنية وتعبت أوي عمري راح بخدم غيري وبخدم الناس اللى مش بترد عليه دلوقتي. أنا فخورة إني مش بوشين حبيت بلدي أوي دائما كنت بقول الحق يكفيني إن محدش عرف يحقق اللى أنا حققته من غير وسطة ولا إمكانيات.. أنا بتحارب بقالي ٦ سنين ولسه بتحارب بشدة في كل حتة حتي في التمثيل معرفش ليه ومن مين. كل مرة يموتوني فيها كنت بقوم عشان أولادي عشان تعبي وعشان الحق يا رب يا رب يا رب أشوف حقي راجع من كل اللى ظلمني قبل ما أموت.كل تهمتي إني نجحت أنا آسفة".