جمال العدل: ريهام حجاج لو مش شاطرة مكنتش أنتجت لها

قال المنتج جمال العدل، إن مسلسل "يوتيرن" ليس أول مسلسل ينتجه للفنانة ريهام حجاج، موضحًا أنها كانت إحدى بطلات مسلسل سجن النسا.

وأضاف العدل، في حواره مع الإعلامية بسمة وهبة مقدمة برنامج "العرافة"، على قناة المحور: "ريهام حجاج ممثلة شاطرة جدا وظُلمت في التجارب السابقة، ورهاني عليها كان السنة دي، ومبسوط منها، ممثلة شاطرة وهايلة ومذاكرة دورها وملتزمة، وشبه يسرا ونيللي كريم والشغلانة اللي احنا اتربينا عليها".

وتابع: "رهاني طلع مظبوط والحمد لله إنها كسرت الدنيا السنة دي"، وعما إذا استجابت لتعليماته في كواليس تصوير المسلسل، أوضح: "شغلانتنا مفيهاش تعليمات، لكن قواعد تربينا عليها، كأي مهنة أخرى".

وأردف: "ريهام حجاج جات على روحها أكثر من اللازم عشان تمحي عن نفسها الكلام اللي الناس كانوا بيقولوه عليها، ولو مكنتش شاطرة مكنتش هنتج لها، لكني فوجئت بلجان إلكترونية، لدرجة إن واحد قال إن أسوأ حاجة عملها في حياته إنه اشتغل مونتاج في مسلسل يوتيرن مع ريهام حجاج، ولا حد يعرفها في المسلسل، وده محدش يعرفه أصلا، لأن المونتاج الوحيد الموجود في المسلسل سيدة".

قال المنتج جمال العدل، إنه يتمنى العمل مع الفنانة روجينا والفنانة حنان مطاوع، موضحًا: "الاتنين ممثلين جامدين جدا ومأخدوش حقهم".

وأضاف العدل : "الظروف الإنتاجية مش خدماهم، موهبتهم أهم من كده"، مشيرًا إلى أنه يحب مصطلح "الصف الثاني"، ويعتبر أنّ كل فنان محترف في دوره.

قال المنتج جمال العدل، إنه يقود الأعمال التي ينتجها بالشراكة مع المخرج، إذ يؤمن بأن المخرج هو رب العمل، موضحًا: "كل واحد بطل في دوره، والسنة دي بشوف إن الفنان محمد ثروت المفروض يتبوأ مكان مهم جدا في الكوميديا والتمثيل ويبقى بطل مسلسلات وأفلام".

وتطرق العدل ، إلى مسلسل "بـ100 وش"، ووضع الفنان مصطفى درويش كإسم ثالث بعد نيللي كريم وآسر ياسين، موضحًا: "بعد نيللي وآسر ياسين كل العصابة زي بعض، مصطفى اشتغل معايا 10 أعمال، وكلهم عندي زي بعض، والحمد لله إنهم نجحوا وبقوا موجودين في أكتر من مسلسل".

وأكد، أنه غضب من مصطفى درويش بعدما انسحب من فيلم الملحد، واصفا إياه بأنه تزيد لا معنى له: "حسيت إنه راجل مش لطيف وبايخ لأنه ميصحش يعمل كده على الملأ، حتى لو عنده رأي عيب يعلنه كده، خاصة إن مخرج العمل من أهم الناس اللي طلعوه، اللي عمله مزايدة وحاجة تخص التريند والسوشيال ميديا وهو موقف سخيف وملوش لازمة".

وتابع: "لما أقول على فنان إنه صف ثاني أو ثالث كأنه بهينه: "معنديش حاجة اسمها بطولة مطلقة، يسرا مش بطلة مطلقة السنة دي، معاها مي كساب وشيماء سيف وغادة عادل، وريهام حجاج معاها ناس كتير، ونيللي كريم ذلك .. مفيش حاجة اسمها بطل مطلق لأننا مش بنلعب تنس، المخرج بطل والمونتير بطل"