ماذا قال علي الحجار عن المهرجانات؟

عبر الفنان علي الحجار عن رأيه في المهرجانات ومنظور الفنانين لهذا النوع من الأغاني، قائلًا: "في البداية هقول بليغ حمدي قدملي المثل سنة 77، فأما ما ينفع الناس فيكث في الأرض، في حاجات كتير حصلت ومشيت خلصت إلا لو كانت أصيلة فهتستنى معاك".

وأضاف خلال أحد اللقاءات التلفزيونية: "فلو اللى بيحصل دا ليه أصل وتراث غصب عن عين الكل وكل القرارات هيفضل، وإلا إذا كان زوبعة فمش هيبقي ليه أثر وهيروح".

واستكمل: "أنا اللى مطمنني إن جمهور مصر بيسمع أنغام وشيرين وصابر الرباعي ومدحت صالح وهاني شاكر وأصالة وكاظم الساهر، فالجمهور لسه بيسمع الحاجات الحلوة وبيعرف يميز".

وتابع علي الحجار: "إحنا بس محتاجين تاني نرجع ونكتشف مطربين بهذه القيمة والموهبة والجمال وندعمهم ".

وأضاف: "أنا بعمل حفلة شهرية بقالي 14 سنة وشوية ومستمر فيها فجالي فوق الـ2000 بني آدم من جميع محافظات مصر بعتولي أصوات عظيمة وقصائد وعازفين وشعراء حاجة ضخمة جدا تفرحك وتخضك إن الناس دي إزاى مش بنقدمها ومن غير مسابقات بقي مين يكسب ومين يزعل لأ بدأنا المواهب دي تجيلي أعمل بيهم صالون ثقافي وفني ويسمعوهم الناس وفي الحفلات اللى بتتصور وحاجة حلوة دول بيخدموا مصر وأنا مش هقدر أعمل كدا زي قناة تلفزيونية".

وعن أحدث أعماله التلفزيونية قال: "والله جاتلي مسلسلات كتير بس لأ يعني بعد ما عملت ذئاب الجبل والأيام والرحايا وشيخ العرب همام مفيش داعي إني أعمل حاجة أقل منهم فاللى جاتلي مش لأ مش هينفع".

وتابع: "أنا مستني الحاجة اللى تجيلي مناسبة لأن اللى يخلي الفنان يوافق على الغناء في مسلسل بيبقي عامل حساب لحاجتين لاسم المخرج وإسم المؤلف بيبقوا عنوان يطمنك".

واختتم الحجار: "الرسالة اللى أحب أوجهها للفنانين إنهم يروحوا الصعيد إنه إحنا نيجي كتير الابتسامة والاستقبال والكرم الجميل كفاية والكرم مش بس المُضايفة الكلمة الحلوة تعتبر كرم والابتسامة أكتر موضوع يبسطك وتقول أنا عايز أرجع تاني".

يذكر أن علي الحجار قد طرح أغنية "اشتقنالك" فى شهر رمضان الماضى، من كلمات النجم صلاح عبد الله ولحن أحمد الحجار، وتقول كلمات الاغنية "اشتقنالك اشتقنالك اشتقنا لحسنك وجمالك، يا أجمل شهر في السنة ياشهر البركة والهنا، اشقتنالك وأول مايهل هلالك نكون جاهزين في استقبالك".