بهاء طايل يكتب: جيت متأخر

جيت لى يا شعر كتير متأخر

جيت لى فى الوقت الضايع

جيت والرف خلاص بيصفر

طب كنت تعالى بدرى شوية

قبل العمر ما يجرى وأكبر

كنت تعالى و انا قلبى اخضر

كنت فى حالى وراضى بصمتى

و مهما حصل لى مش بتغير

جاى دلوقتى و بتتشطر

وتعلمنى ارص الحرف

واغزل كلماتى واسطر

كنت تعالى لما كلامى كان

متبعتر

كنت تعالى لما سكت

وما قدرتش عن حبى اعبر

يوم ما قالت لى

إن الصمت معناه اكبر

كنت تعالى بدرى شوية

بس خسأرة جيت متأخر

جيت بعد ما سن القلم اتكسر

جيت لى فى الوقت الضائع

جيت و الرف خلاص بيصفر