عنتر أغا يكتب.. كبيرة تملي ورزينة

كبيرة تملي ورزينة

واسمك عالصدور زينة

بتبكي ليه وحزينة

ابنك رمز وعلامة

عشان إبنك ومن صلبك

وسيف ودرع في حربك

ودمي نار على دربك

فلا تلتفتي لملامة

دنا شمسك وربيعك

لا عمري أخون ولا ابيعك

على عيني في توديعك

دعاكي رحمة وسلامة

إبن حلال ومن صلبك

بيصرخ يا اما ما يهمك

وقت الشدة أقول عنك

حصاد الخصم ندامة

أنا جندي من أجنادك

وفخر أموت على بابك

ودمي يروي في ترابك

شهادتي رجولة وشهامة

ملازم الحق تملي

نقيب وربنا يعلي

رائد ومقدم وعميد

ولوا ربنا يخلي

تعالي وشوفي يا عنية

ملايكة ونور حواليه

وجند خلد فوق ليا

ياما دعيتي لي ياما

دعيتي بخلد وبجنة

فيها نفرح ونتهنى

ليه أتأخر ليه أستنى

ولو كان التمن روحي

وتاج وشفاعة تستاهلي

مع سبعين من أهلي

بنات الحور بتندهلي

فلا تبكي ولا تنوحي

علقي نور مع الزينة

وقولي ما حد يعازينا

سلامي للكل يا امايا

ولأولادي شهد وزينة

كبيرة تملي ورزينة

واسمك عالصدور زينة

رحم الله شهداء الوطن وأسكنهم جميعا فسيح جناته