خواطر رأفت عبد العظيم

أصناف البشر زى الكائنات المائية فيهم الطيب الوديع زى البلطى .. وفيهم الشقى اللئيم اللى ماتعرفش تمسكه زى القرموط .. وفيهم اللى عمره مايشبع زى الحوت .. وفيهم اللى ليه فى كل سكة مصلحة وكأنه أخطبوط .. وكمان فيهم الشرس اللى مايرحمش زى القرش .. وفيهم الضعيف المسكين اللى لا حول له ولا قوة زى البساريا ...

__ ياريت يخترعوا مضمضة أو معجون أسنان من مية النار يطهر الأفواه قبل الكدب وبعده ..

__ وأنا فى عمر الـ ٦٧ حاسس كأنى شجرة عجوز لا تتحمل ريح وأغصانها لا تتحمل وقوف طائر عليها .. ابتسم برضا وأقول لنفسى بأسى : سنة الحياة ..

__ الجلوس والأسترخاء فى راحة وإطمئنان وسط نزلاء مستشفى الأمراض العقلية أفضل ألف مرة من الجلوس وسط عقلاء وحكماء المدينة ..

__ عندما استمع للمطرب الكبير عبد الحليم حافظ وهو يغنى " وستعرف بعد رحيل العمر بأنك كنت تطارد خيط دخان " أحس وكأنه كان يقصدنى أنا ..

__ كلنا أو معظمنا شاف فيلم صغيرة على الحب .. فاكرين الجملة اللى قالتها سعاد حسنى على سبيل التريقة للفنان نور الدمرداش .. قالت : سيبك من الناس وكل اللى بتحبه وعيش حياتك .. والله دى نصيحة روعة ياريت نعمل بيها لأن أرضاء الناس من رابع المستحيلات .

__ سألنى صاحبى : هو المساجين أنواع ؟ .. قلت له : طبعاً .. فيه مساجين جوه الزنازين ومساجين متغربين فى بلاد الغربة ومساجين عالمعاش بين أربع جدران عايشين .

__ الله على حب الخير يطهر القلوب ويغسل الذنوب.