السيناريست لؤي السيد يكشف كواليس «تماسيح النيل»
قال السيناريست لؤي السيد إن ظروف فيلم "تماسيح النيل" حصلت بناء على إن مجموعة النجوم خالد الصاوي، ومصطفي حمدي، ومحمد ثروت، بيومي فؤاد، كانوا يعملون في فيلم مع المخرج سامح عبدالعزيز وحصل شيء وتم إلغاؤه، وطُرح اسمه لإنقاذهم وتنفيذ عمل جديد.
وأضاف "السيد"، خلال لقائه في برنامج "بحب السيما" على ميجا إف إم، "لما كلمني سامح عبد العزيز، كنت أنوي الاعتذار، ولكن حاجة كويسة إني أشتغل مع كل النجوم دول، وربنا وفقني لكتابة العمل، واسم الفيلم كان من اختيار مصطفى خاطر".
وتابع: "لم نواجه مشاكل في فكرة تعدد النجوم خصوصا إن كلهم كانوا أصدقاء وبينهم روح حلوة، والفيلم كان لذيذ ككل.. الموضوع والتصوير والتمثيل وكل العناصر، ولا أفضل تصنيفي ككاتب كوميدي ولكن السوق بيحكم، لو محتاجين كوميديا هات لؤي، لم أكن متخوفا من الممثلين والنجوم مثل خالد الصاوي، وهنادي مهنا وغيرهم قدموا أقصى ما عندهم في الكوميديا، أما كوميديا الإفيه مطلوبة عشان مفيش حد في العالم عنده ده غير المصريين".
وذكر أن الفيلم كان تصويره مرهقًا "لأننا سافرنا الأقصر وأسوان وصورنا في المركب، وحضرت معظم التصوير وكنت فى اللوكيشن في أغلب المشاهد، والسيناريو الكوميدى أصعب أنواع السيناريو وكوميديا الموقف مش سهلة، وفي كوميديا الإفيه ده الأصعب لأنك بتدور على الإفيه اللي يعلم مع الناس ويعيش".
وتابع: "اى عمل بعمله لازم أوصل من خلاله رسالة معينة حتى لو كوميديا، وانا لحد دلوقتى لسة بتعلم وبتفرج كتير وبقرأ كتير وطول عمري هفضل أتعلم".
كما علق علي فنانين وقال أحمد عيد أفلامه من نوعية الكوميديا السوداء، ورامز جلال متخصص في الكوميديا الاجتماعية، وربنا كرمنا ببعض، وفي نجوم نفسي أشتغل معاهم زي أحمد حلمي وأحمد مكي ومحمد سعد، ودخلت المجال وأنا كنت بشتغل في مجالي الخاص وبحب أشتغل وأنا ما عنديش أي حسابات، وبكتب أى عمل.
ووجه رسالة لكل المستمعين، أرجوكم فرجوا أولادكم علي إسماعيل ياسين، القصابجي، زينات صدقي، النابلسي، الناس دي جزء كبير من إفيهاتنا وثقافتنا الكوميدية قايم عليهم.
