جريدة الديار
الجمعة 29 مارس 2024 01:07 صـ 18 رمضان 1445 هـ
بوابة الديار الإليكترونية | جريدة الديار
رئيس مجلس الإدارة أحمد عامررئيس التحريرسيد الضبع

”صوتي في أخر لحظة” قصيدة جديدة للشاعر ”ناصر البدري”

وادي الأيام عدت
وبقيت في الآخر
والزمن اللي إنت زمان
كنت بترميه ورا ضهرك
واقف بيبص عليك
شمتان
ساخر
في الأول
كنت الأول
رجيلك كانت بتخطي الخطوة
الناس تتأخر
دلوقت بقيت ورا كل الناس
أو يمكن حتى ملكش مكان في الأخر
الدنيا حواليك فجأة بقت هو
فضيت
مفضلش من الأصحاب
ولا زين ولا سو
لا صديق للضيق
ولا درب العمر بقيله رفيق
اكتب يا غريب مكاتيب
لا جوابك واصل
ولا جيلك رد
وكأنك عمر ما كانلك حد
متحاش وطريقك سد
وإزاي هتواصل
سكة بتقولك مانتاش قدي
اسرع أو هدى
بعد ما كل كلاب الأرض تعدي
يقولولك وقف
مش بلدك دي
ولا دي أرضك
ولا بيتك
ولا صدر حبيبتك
لا الشارع بقي شارعك
ولا كف ايديها السمر تبص من البلكونة عشانك
وتقولك متغبش
والبسمة في دخلة رجلك تملي الوش
لا الحضن بيستر وجعك
ولا حتى الآهة في وسط الليل
بتلاقي اللي يقولك معلش
الدنيا دي غش في غش
وقلوب الناس من قش
القلب اللي هواه
كانت تتنفس منه قلوب الخلق
مخنوق م الكتمة
والعين اللي بتزرع ضي في سكتهم
تحصد عتمة
وسما بتسود
مين خلى الحب طريق للغربة
والعشق طريق للفقد
ايه خلي عنيها المرسومة علي وشك شوق مش شايفة عنيك
دلوقت
القلب إزاي مبقاش قادر يلقط صورتك
بعد ما كان برواز لملامحك
بتموت من الجوع
بعد ما كانت إيدها شجرة تفاحك
وسنابل قمحك
بعد ما كنت النهر اللي بيروي عطشها
غيرك
عاشها
وإنت اللي تموت عطشان
كنت الغلطان
لما أمنت لدنيا بيحرسها لصوصها
سيفهم زيفهم
ووشوشهم مفهاش ريحة إنسان
فاكر لما زمان كنت الصياد
في بحور الهوا قلبك يصطاد
بالحب عرايس بحر بترقص جنب مراكبك
وغرورك راكبك
بتدور علي جنية صورتها اترسمت جوا خيالك
دلوقت اتبدل حالك
وبقيت تتسول كلمة تطمن بيها الروح
ومنين ماتروح
ماتلاقي إلا وجع القلب
وتعود مجروح
ما كفاية بقي ..
مبقاش في القلب مكان لجروح
دمك علي سكة روحك ورجوعك
مسفوح
عشقك مفضوح
لا سكوتك قادر يحفظ سرك
ولا نفعك بوح
فاكر لما قصايدك كانت بتعلم
الحب لطوب الأرض
وعلي الخدين
بتخلي دموع العين تتكلم
تنزل ع الصخر تعلم
شعرك مبقاش بيحنن قلب
موالك مبقاش دوا للعشاق
وغناك مبقاش للشوق ترياق
خوفك ..
كان هو السم اللي في جوفك
قضبان السجن المزروعة حواليك
منعت شوفك
فغفلت عن السجان
والسجن مش بس مكان
السجن دا معنى بيقتل فينا الروح
يحبس جوانا الصوت
يكتم أفواهنا
ويحول ملامحنا لأشباهنا
يخرس ضمايرنا
ويخلي صغيرنا كبيرنا
ومهما هربنا
بيفضل جوانا منين ما نروح
والحرية مش هي
إنك تصرخ بس
أو أني أحس
بأني مجرد عايش
وبحس
وبعيش اليوم بطلوع الروح
و بجيب اللقمة بخلع الضرس
واكل من غير رضا أو نفس
الحرية هي أني أقول للكلب ياكلب
في وشه بعلو الحس
أزعق في الموت
لو فكر مرة يقرب منك
بعلو الصوت
مش همس
الحرية ماشية بربئة في قلب الليل بأمان
ساعة روقان
من غير أحزان
أو هم وخوف من قارصة جوف
أو غدر جبان
لابد في غطان الحلم
بينهب قوتنا
ويهد بيوتنا
وينسجلنا من غزل خيوط حلمنا
خذلان
يسرق خطوينا من العنوان
الحرية أمل في عيون صبيان طالعين
زي عيدان الورد
وصبايا زي غصون النرجس والياسمين
واعدين واعيين
قاريين
كاتبين حدوتة بطعم الفرحة
لابسين فستان أبيض
والطرحة بتبشر بالأيام الجاية بدون أحزان
أطفال زي نجوم السما بتنور
ووشوشهم زي البدر مدور
متشوفش في ملامحهم لون القسوة
ولا شكل الحرمان
الحرية وطن من نور
من غير سجن وباب مقفول ورا سور
من غير قهر و ظلم وجور
ولا نهر بيعطش موت
وغيطان بتموت
وأراضي تبور
الحرية قانون وميزان
قصة بتحكي عن الإنسان
لوحة جريئة بأيد فنان
تجنن فيها الفكرة مع الألوان
الحرية صلاة الحب لرب حنون
مش راكعة لحاكم مجنون
أو ساجدة لأصنام مصنوعة من الأسمنت
وإله من جبس
الحرية لقمة عيش من غير ذل
وكسرة نفس
الحرية مش غني أو نوح
أو أني بحبك أبوح
الحرية هي أني أحبك زي ما عايز احبك
من غير خشي
وبكل وضوح
اهزم خوفي
وارسملك بكرة بشوفي
مش بعيون كدابة وظالمة
واعشق في النور
مش في الضلمة
أكل من غير ما يكون الدم غموس اللقمة
واكتبلك يا حبيبتي من غير رعشة أيد
أشكيلك وأحكيلك
أشعرلك أغنيلك
وأجيلك بمشيلك
بقدم حرة
مش في حبال وحديد.