شخابيط فنّية !! يشخبطها لكم.. ياسر بدوي

عمري ما كنت نجم وكمان ما أحبش

حيا الله كاتوبجي فقير علي باب الله

أمشي علي مهلي كده ولا أمدش

رامي رمشي لبكره وللأمل منتهاه

قلبي جراب حاوي والغناوي ماتعدش 

عابد لربي وربي عمري ما خفت إلاه

فما تتآتكش يا عم أنا ما اتآتكتش

رغم إني لو حضنت قلمي ...........

الكون كله يقف إنتباه .

 { عيش الفن !! }

نهاركم كويس ... يتسائل العديد من المهتمين بالفن , ومحبيه .. عن سر قل أو أسرار التدني المرعب الذي حدث ويحدث في الفنون المصرية علي إختلاف أنواعها .. وبما أنني من اللذين إمتحنهم الله بكونهم من الموصومين بالفن .. أقول لكم من وجهة نظري  - التي ليس لها قيمة علي الإطلاق .. مدد يا شلبوكة -  أقول لكم أن الأسباب تتعدد وتتخطي حتي علوم المنطق المتعارف عليها .. وسأحاول قدر إمكاني .. أن أعرض لحضراتكم وجهة نظري تلك التي .... أيوه .. إسم عليكم بالضبط كده .. تباعا في عدة مقالات نتحدث فيها عن أسباب هذا التدني .

أول الأسباب .. هي أفران العيش الفني !! .. لا تتعجبوا .. فلي مقصد لا يخلو من الخبث واللؤم النقدي .. قالوا زمان في الأمثال .. ( إدي العيش لخبازه .. ولو حياكل نصه .. !! ) ليه بقي !! .. أقول لكم أنا ليه .. الخباز علشان دي صنعته حيخبز صح .. وحيطلع عيش يتاكل وتمام التمام .. فلو نقص منه حتي نصه !! .. سيبقي لك ولمن حولك ما تأكله بألف هنا وشفا .. لكن لو عك واحد من إياهم فلا حيبقي في عيش ولا نيلة .. وجنابك حتخسر الدقيق والسمن والخميرة والذي منه .. ويبقي الناتج عجين بايظ ومحروق يترمي في الزبالة وتقرف تاكله الكلاب الضالة في الشارع .. يبقي الأصح إيه يا عمنا ؟ .. إنك تدي العيش لخبازه ..

إللي بيحصل بقي في الوسط الفني من فترة طويلة .. إن الخبازين قاعدين في البيت .. والفتوجية والفهلوية هم إللي بيعملوا كل حاجة !! ..

النجم لإنه هو الللي بيجيب مشاهدات وإعلانات .. بيكتب ويخرج ويختار مدير التصوير ومهندس الديكور وطبعا الممثلين والممثلات إللي حيمثلوا قصاده !!

مخرج شايف نفسه ومصاحب المنتج أو في بينهم مصالح وبيزنس رايح جاي .. يقوم يألف ويكتب السيناريو .. ويجيب عيلته كلها تقترح عليه القصة والمشاهد .. ويلعبوا البطولة .. والنتيجة .. مسخرة درامية فنية تكسف وتعر وتفضح الفن المصري كله !!

عيل تافه ومتخلف عقليا .. يشتغل فترة تحت إيدين كذا مخرج كمساعد سادس ولا حاجة .. هوب فجأة تلاقيه مخرج ومعاه إنتاج كبير .. وعك وربك يفك .. المهم تنقي ناس تساعدك في الإخراج بتفهم .. ومدير تصوير شاطر يبقي هو المخرج من تحت الترابيزه .. والنتيجة ... بالضبط كده .. زي ما حضراتكم تفضلتم وعرفتوا لوحدكم !!

ده طبعا غير إن التمثيل أصبح مهنة من لا مهنة له .. زيه بالضبط زي سواقة التوكتوك .. أي حد ممكن يسوق توكتوك .. وأي حد ممكن يمثل .. سواق التوكتوك لازم يبقي بيئة وعربجي ومسجل يا ريت .. والممثل يا إما شكله بيقول .. يا إما شكلها .. قال فعلا !!

جمال عبد الناصر لما حب يستفيد من ريادة الفن المصري في ذاك الوقت .. عين الأستاذ الكبير صلاح أبو سيف رئيس جهاز السينما .. وتخيلوا مين كان ماسك الرقابة علي المصنفات الفنية !! .. نجيب محفوظ .. والموسيقار محمد عبد الوهاب للجنة إعتماد الأصوات في الإذاعة .. يا خلق هو .. عايزين ريادة الفن المصري ترجع تاني ؟ .. إدوا العيش لخبازه أبوس إيديكم .