نبيلة هاشم في حديث القلب

مش عارفه ابدأ إزاي.. بس الأكيد إني هبدأ...

حاجات كتيره جدا.. نعم عظيمه ربنا سبحانه وتعالى قدمها لنا.. ممكن نكون شايفينها حاجات بسيطه أو نقدر نستغنى عنها لكن سبحان الله... مع أول فقد لأي نعمه من النعم دي بتبان قد أي هي نعمه كبيره وعظيمه...

فقدان حاسة الشم... أنا مره وآحده حسيت إن انفي مش موجود.. وكأن مكانه هوا بارد... مفيش تمييز للأكل كل حاجه سواء يعني لو في حريقه حضرتك مش هتشمها.. شيئ صعب جدا فقدان حاسة التذوق... كل الاكل زي بعضه مايه ساقعه بدون مبالغه... يعني لو معاك مال الدنيا و هتشتري اغلى الاكلات ممنهاش لازمه لأنها ملهاش طعم.. مش هتحس غير كأنك بتاكل مايه أسوأ شيء على الإطلاق.... إنك مش قادر تقوم من مكانك وكأن حد ضربك علقة موت.. تحس إن عظمك بيتكسر جوا جسمك من غير ماحد يلمسك وإنت مش فاهم برضو... ناهيك بقى عن كمية الصداع الرهيبه والارف وآلام المعده وحاجات كتييييرمن كوفيد١٩(كورونا)

فيروس لايرى بالعين المجرده صحيح إحنا مش عارفين هو نعمه أو نقمه... ممكن عند البعض نقمه.. وممكن عند البعض الاخر نعمه.. إنه يكون جه في وقت عشان تفوق من غفله معينه.. جاي كتنبيه أخير عشان تعرف قدرة ربنا سبحانه وتعالى عليك... جاي يختبرك في الصبر وكيفيه التعامل مع الله في الابتلاء.... جاي عشان تقدر تشوف الناس إللي حواليك صح... مين معاك وبيحبك بجد ومين كان بيمثل... جاي عشان تتأكد من جواك إنك عايش... إنك قوي... إنك تقدر....


كل الأدوية في علاج هذا الفيروس... مهمه جدا واتباع التعليمات كمان مهم جدا... بس في جزء من العلاج مجهول عند البعض.. النفسيه... إحساسك إن في ناس حواليك بتحبك.. عوزاك... دا بيساعدك ان تخف.. وكأن الفيرس ده جاي يقولنا خليكم مع بعض حتى لو من بعيد وكأنه قاصد يعلمنا الإحساس... وإن الحضن مش بس باللمس... لا الحضن أساسه الاحساس... وكأنه قاصد يلعب على نقطة الشعور...


الحمد لله حمدا كثيرا كما ينبغي لجلال وجهه وعظيم سلطانه.... تجربه حقيقي صعبه دعواتكم بالشفاء العاجل غير الآجل لي ولكل مريض

#نبيله_هاشم