مدحت الشيخ يكتب: الفلوس والمواطن

علاقة الفلوس بالمواطن أصبحت علاقة فيها شد وجذب أكتر من أي علاقة تانية في حياته، لدرجة إنك لو بصيت في وش المواطن الصبح، هتلاقيه بيكلم الفلوس في سره: "طب ارحميني شوية!" وهي ترد: "أنا مش بتاعت رحمة.. أنا بتاعت أرقام!"

المواطن مش عارف ينام، لأن كل ما يغمض عينه، يفكر في قسط آخر الشهر، وفاتورة الكهربا اللي بترن في ودنه حتى وهو نايم. والفلوس؟ دايمًا مستعجلة، عندها مشاوير كتير: مصاريف مدارس، دواء، أكل، بنزين، وما تنساش كمان "طلبات البيت اللي مبتخلصش".

حاولوا يعملوا صلح، جابوا الحكومة وسيط، الحكومة قالت: "إحنا بنحاول نعمل توازن!" والمواطن قال: "يعني نعيش؟" ردت الحكومة: "لا، يعني نكمل!"

فالفلوس بصت للحكومة وقالت: "بصراحة أنا مش فاضية أتكلم دلوقتي، عندي 100 مليون طلب لازم أخلصهم قبل المغرب".

حتى البنوك، بقت شبه طوابير العزاء.. كله جاي يودّع اللي معاه، مفيش حد داخل يفرح!

زمان كنا نقول "الفلوس وسيلة مش غاية"، دلوقتي بقت الغاية والوسيلة والإحساس بالآدمية.

والمواطن؟ بقى زيه زي الموبايل القديم، بيشحن بصعوبة، وبطاريته بتخلص قبل الضهر.

يمكن نحتاج وسيط جديد... مش حكومة، ولا بنك، ولا خبراء اقتصاد. نحتاج "معالج نفسي" يقنع الفلوس إنها تطوّل بالها شوية... والمواطن إنه يفك التوتر ويعيش يوم بيومه.

بس للأسف، لا الفلوس بتسمع، ولا المواطن فاضيله يعيش.