نبيلة هاشم تكتب : عن الفرحة الكاملة

الفرحة الي حسيتها أول ماعرفت الخبر.. عن مشاعر اتلخبطت.. وخيال اترسم.. وحياه من أول وجديد بتتظبط.. عن الإبتسامه المرسوم جوا قلبي..

 

عن لهفة أني أشوفك وسر السعادة جوايا رغم الألم والوجع.. عن فرحة أول نبضه واهتمام بأكلي ولبسي وكل حاجه فيا بس عشانك.. عن احساس بيتجدد كل مره وبيزيد أكتر وأكتر..

 

عن أحاسيس جديده وأول مره أعيشها.. عن لحظة استنيتها تيجي بفارغ الصبر.. وجواها أمل كبير وخوف أكبر.. وقلق انك بخير أو لا.. عن أولادي عن عشقي ليهم ودعائي أنهم دايما يكونوا بخير..

 

أنا أم زي أي أم مشاعر متلخبطة.. وأحاسيس كتير مخفية.. بتبان وقت الأزمة... مشاعر الأمومة مستحيل حد يوصفها.. دا الحب الفطري المولودين بيه تلاقي البنت وهي صغيره تحب العرايس وتحب تاكلهم وكدا والولد يحب العربيات والمسدسات..

 

سبحان الله حب فطري.. بس الأم بتحب كل حاجه العرايس والمسدسات بتحب أدق التفاصيل في أولادها نومتهم ضحكتهم.. وأكتر حاجة حضنهم أنا لما بحضن ولادي بحس أن الدنيا كلها بين إيديا..

 

ولادي سر سعادتي في الحياة.. واستمراري فيها وإصراري أني أكمل رغم كل الظروف المحيطة .. أوقات كتير بعجز عن التفكير في حل مشكلة ما أو كدا.. وممكن بعد حضن ولا كلمة من أي حد منهم الاقي الحل..

 

الأولاد نعمة كبيرة من ربنا.. نفوسهم بريئة وحياتهم بسيطة بترضيهم الكلمة وبيحبوا الحضن وأقصى حاجة بيطلبوها هي لعبة.. بفرح قوي لما العب معاهم بنسى نفسي وسني ومشاكلي وكل حاجة.. بحب دايما يكونو مبسوطين وأقل حاجة دايما بتفرحهم..

 

بوسه الصبح وهما نايمين بتسعدهم باقي اليوم.. حلمهم بسيط.. والحياة معاهم حياة بجد...

 

أولادي سر سعادتي... صاحبوا أولادكم لأن هي دي الصداقة الدائمة...