رانيا فريد شوقي: ”والدي اتأثر بشخصية البخيل وأنا”
قالت الفنانة رانيا فريد شوقي: "عمري ما حوشت ولا أنا ولا أبويا وفلوسي دايما طايرة، وبناتي مش بيحوشوا وطالعين زيي رغم إني جيبت لهم حصالة كذا مرة بس مفيش فايدة، وانا من الشخصيات اللي مبدأها هين قرشك وما تهينش نفسك".
جاء ذلك خلال مداخلة هاتفية لبرنامج "زق عجلك"، الذي يذاع على شعبي إف إم، والبرنامج من تقديم شيماء السباعي و تامر جابر.
وأضافت: "بنتي ملك ميالة للفن زيي، بس قولت لها تخلص دراسة الأول ونتكلم".
وعن والدها القنان فريد شوقي فقالت: "بابا الله يرحمه اتأثر بشخصية عوض في مسلسل البخيل وأنا، وجرب فينا حاجات كتير وقت تصوير المسلسل، و دايما يقول لي أنا وإخواتي أنا مش هسيب لكم فلوس، بس هسيب لكم شهادات تجيبوا منها فلوس".
وذكرت أن: "الأجيال الجديدة عندها وجهات نظر أوروبية، إنها مش لازم تاخد شهادة، وبنتي ملك قالت لي انا عايزة آخد كورس تمثيل ومش لازم أدخل الجامعة، و دوري في حياة ولادي إني حيالله أمهم، والجيل الجديد بيعمل اللي هو عايزه".
تصوير أبو العروسة 3 و الحلم
وتابعت رانيا فريد : بصور حاليا مسلسل "أبوالعروسة" الجزء الثالث، وبكمل تصوير مسلسل "الحلم"، و مش شايفة إن فيه فرق بين مسلسلات رمضان والمسلسلات اللي بتتعرض خارج رمضان، وأهم حاجة من وجهة نظري اختيار الورق الجيد، وده اللي اتعلمته من بابا، إن راس الهرم هو السيناريو.
أما عن زوجها فقالت: "جوزي عامل لي دعم كبير في شغلي، لأن مهنتنا صعبة جدا ومالهاش مواعيد، ومش أي راجل شرقي يتقبل طبيعة شغلانتنا".
واختتمت قائلة: "برفض الظهور في البرامج اللي بتتدخل في الحياة الخاصة، والمذيعين اللي بيعصروا الفنانين ويقعدوهم على كرسي الاعتراف، لو إحنا كمان تدخلنا في خصوصياتهم وحياتهم الشخصية هنطلع منهم مشاكل كتير".
مسلسل الحلم
يشارك عدد من النجوم فى مسلسل الحلم بطولة رانيا فريد شوقي، محمد رياض، انوشكا، صابرين ، مي كساب، كمال أبو ريه وعدد من النجوم ،من اخراج حسني صلاح
